کراچی: کورنگی میں رکشہ ڈرائیور قتل ، شاہ لطیف سے خاتون کی لاش برآمد

کراچی (اسٹاف رپورٹر) کورنگی میں فائرنگ سے رکشا ڈرائیور جاں بحق جبکہ سائٹ ایریامیں ایک نوجوان زخمی ہوگیادوسری جانب شاہ لطیف میں ندی کے قریب سے خاتون کی گلے میں پھندا لگی ہوئی لاش ملی ۔ تفصیلات کے مطابق ہفتہ کی شب کورنگی کے علاقے ساڑھے تین نمبر رحیم آباد اتوار بازار کے قریب فائرنگ سے 40 سالہ جاویدجاں بحق ہوگیا۔

زمان ٹاؤن پولیس کا کہنا ہے کہ فائرنگ کرنے والے نامعلوم ملزمان موٹر سائیکل پر سوار تھے جو فرار ہوگئے تاہم فوری طور پر فائرنگ کی وجہ کا تعین نہیں ہو سکا۔ادھر سائٹ ایریا غنی چورنگی کے قریب نامعلوم ملزمان کی فائرنگ سے عمیر نامی شخص زخمی ہوگیا ۔ دریں اثنا شاہ لطیف ٹاؤن کے علاقے یار محمد گوٹھ ندی کے قریب سے خاتون کی لاش ملی ۔

ایس ایچ او ملک مظہر اعوان نے بتایا کہ مقتولہ کی فوری طور پر شناخت نہیں ہو سکی جبکہ اس کے گلے میں پھندا لگا ہوا تھا ، مقتولہ کی لاش برقع میں تھی جسے نامعلوم ملزمان قتل کرنے کے مذکورہ مقام پر پھینک کر فرار ہوگئے جبکہ اس کی عمر 35 سال کے قریب بتائی جاتی ہے تاہم پولیس بائیو میٹرک سسٹم کی مدد سے اس کی شناخت کی کوششیں کر رہی ہے ۔