ٹریفک حادثات میں پولیس اہلکار سمیت 5 افراد جاں بحق

کراچی(اسٹاف رپورٹر) شہر قائد میں ٹریفک حادثات میں پولیس اہلکار سمیت 5افراد جاں بحق اورایک لڑکی سمیت 6افراد زخمی ہوگئے ، تفصیلات کے مطابق حیدری مارکیٹ کے علاقے فائیو اسٹار چورنگی کے قریب تیز رفتار کار کی ٹکر سے موٹرسائیکل سوارزخمی ہوگیا،اطلاع پر پولیس اورریسکیو عملہ موقع پر پہنچ گیا ، پولیس نےزخمی شخص کو ایمبولنس میں عباسی شہید اسپتال سے جناح اسپتال منتقل کیا، جہاں وہ دم توڑ گیا۔

ایس ایچ اور شمشاد چاچڑ نے بتایاکہ اسپتال میں متوفی کی شناخت علی حسن کے نام سے ہوئی جو لیاقت آباد کے علاقے شریف آباد کا رہائشی تھااور ایس ایس یو ہیڈ کوارٹر میں بطور پولیس کانسٹبل تعینات تھا،پولیس حکام کے مطابق ہفتے اور اتوار کی درمیانی شب متوفی اپنے سسرال سے واپس گھر جارہا تھا کہ اس دوران سوزوکی آلٹو کار نے ٹکر ماری تھی،پولیس نے سی سی ٹی وی فوٹیج کی مددسے کارکا نمبر نکال کر تلاش شروع کردی ہےجبکہ پولیس نے قانونی کارروائی کے بعد لاش ورثاکے حوالے کردی۔

ڈیفنس کے علاقے فیز ٹو پیٹرول پمپ کے پاس تیز رفتار کار بے قابوہوکر الٹ گئی، جس کے نتیجے میں ایک نوجوان 24سالہ موسی خان جاں  بحق اور ایک لڑکی 20سالہ ماریہ دخترعدنان زخمی ہوگئی اس اطلاع پر پولیس اور ریسکیو عملے نے موقع پر پہنچ کر لاش اور زخمی کو جناح اسپتال منتقل کردیا، ایس ایچ او ڈیفنس شعیب الرحمان نے بتایا کہ متوفی نوجوان کار تیز رفتاری سے چلارہا تھاکہ فٹ پاتھ سے ٹکرا کر الٹ گئی، متوفی ڈیفنس فیز ٹو کا رہائشی تھا اور آبائی تعلق کوئٹہ سے بتایاجاتا ہے، پولیس نے قانونی کارروائی کے بعد لاش اہلخانہ کے حوالے کردی۔ سپر ہائی وے ناردرن بائی پاس نزد رینجرز چوکی کے قریب نامعلو م گاڑی کی ٹکر سے زخمی ہونے والا نوجوان 25سالہ شہزاد ولد غلام حسین عباسی شہید اسپتال میں دم توڑ گیا،جس کی لاش پولیس نے قانونی کارروائی کے بعد اہلخانہ کے حوالے کردی ،پولیس نے واقعے کا مقدمہ درج کرکے تفتیش شروع کردی ہے۔

کورنگی کے علاقے بلال چورنگی کےقریب نامعلو م گاڑی کی ٹکرسے موٹرسائیکل سوار27سالہ فیصل ولد دین محمد جاں بحق ہوگیا، جس کی لاش پولیس نے جناح اسپتال پہنچائی ، تاہم پولیس واقعے کی مزید جانچ کررہی ہے ، سائٹ ایریا کے علاقے بیٹری کمپنی کےقریب نامعلو م گاڑی کی ٹکرسے 45سالہ نامعلوم راہگیر جاں بحق ہوگیا، جس کی لاش پولیس نے ایمبولنس کی مدد سے عباسی شہید اسپتال منتقل کی ، پولیس کے مطابق متوفی کی فوری شناخت نہیں ہوسکی ہے۔علاوہ ازیں ساحل کے علاقے سی وی نزد دو دریا کے قریب ریس لگانے والی موٹرسائیکلیں آپس میں ٹکرا گئیں، جس کے نتیجے میں پانچ نوجوان زخمی ہوگئے، جنہیں ایدھی ایمبولنس کی مدد سے جناح اسپتال منتقل کیا گیا ، جہاں زخمیوں کی شناخت 22سالہ حسیب، 22سالہ سیف اللہ ،21سالہ حضرت گل ، 19سالہ علی اور18 سالہ طحہٰ کے نام سے ہوئی۔