عمران خان از خود گرفتاری دے سکتے ہیں،شاہ محمود قریشی

لاہور: تحریک انصاف کے رہنما شاہ محمود قریشی کا کہنا ہے کہ پولیس والے زمان پارک انسانی لاشیں گرانے کا ارادہ لے کر آئے ہیں،ہو سکتا ہے خون خرابے سے بچنے کیلیے عمران خان از خود گرفتاری دے سکتے ہیں۔

زمان پارک کے قریب میڈیا سے بات کرتے ہوئے تحریک انصاف کے رہنما شاہ محمود قریشی کا کہنا تھا کہ ہم نے پہلے بھی قانون ہاتھ میں لیا نہ اب لیں گے، ڈی آئی جی مجھ سے ملاقات کرکے عمران خان کے وارنٹ دکھائیں، میں وارنٹ کو پڑھ کر چیئرمین سے بات کروں گا، ہم آئینی راستہ نکال لیں گے،

شاہ محمود قریشی کا کہنا تھا کہ ڈی آئی جی سے گزارش ہے کہ حالات نہ بگاڑیں، خوف وہراس پیدا نہ کیا جائے، پولیس سے کہتا ہوں واٹرکینن اور آنسوگیس کی شیلنگ بند کرے، ہم خون خرابہ نہیں چاہتے، بات کریں ہو سکتا ہے ہم خود گرفتاری کیلیے تیار ہو جائیں۔

رہنما پی ٹی آئی نے کہا کہ پولیس بتائے کہ یہاں آنے کا مقصد کیا ہے، یہ لوگ انسانی لاشیں گرانے کا ارادہ لے کر آئیں ہیں، ہم یہاں لاشیں گروانا نہیں چاہتے، ہم الیکشن ملتوی کرنا نہیں چاہتے، ہم قانون ہاتھ میں لینا نہیں چاہتے، ہماری سمجھ کے مطابق عمران خان کی گرفتاری نہیں ہوسکتی، کیوں کہ ان کی 18 تاریخ کو پیشی ہے۔

شاہ محمود قریشی کا کہنا تھا کہ کل کی ریلی اور مینار پاکستان کے جلسے کے اعلان نے حکومت کے اوسان خطا کر دیئے ہیں، ہم حکمرانوں کےارادوں کےغافل نہیں۔