منشیات اسمگلنگ میں ملوث غیر ملکی میاں بیوی گرفتار

کراچی(اسٹاف رپورٹر)منشیات اسمگلنگ میں ملوث غیر ملکی میاں بیوی گرفتار کروڑوں مالیت کی منشیات برآمد کرلی گئیں ، ایس پی بلدیہ مغیث احمد ہاشمی کی نگرانی میں ایس ایچ او تھانہ بلدیہ انسپکٹر محمد نواز گوندل نے خفیہ اطلاع پربلدیہ نمبر 4 حب ریور روڈ پر حب چوکی بلوچستان کی جانب سے آنے والی ہائی جیٹ (ہائی روف) کو چیک کیا۔گاڑی میں سوار ملزمان کے قبضے سے ساڑھے تین کلو آئس اور ایک کلو 25 گرام ہیروئن برآمد ہوئی۔

ایس ایس پی فدا حسین جانوری کے مطابق گاڑی میں سوار تین ملزمان کو موقع پر گرفتار کیا گیا جنکی شناخت نصیب اللہ اسکی اہلیہ راحیلہ اورڈرائیور ماہر ولد شکیل کے نام سے ہوئی ،گرفتار ملزم نصیب اللہ اور اہلیہ راحیلہ افغانستان سے غیرقانونی طریقے سے بارڈر کراس کرکے پاکستان میں داخل ہوئے ہیں۔

ملزمان کے قبضے سے برآمدہ منشیات کی مالیت عالمی منڈی میں کروڑوں کی بنتی ہے۔ ملزمان کے خلاف اینٹی نارکوٹکس ایکٹ و فارن ایکٹ کے تحت مقدمات درج کرلیے گئے ہیں، تاہم مزید تفتیش کا عمل جاری ہے ۔