فل کورٹ کا راگ الیکشن سے بچنے کیلئے الاپا جا رہا ہے،پرویزالہیٰ

لاہور (امت نیوز) سابق وزیر اعلیٰ پنجاب اورپی ٹی آئی کے مرکزی صدر چوہدری پرویز الہٰی نے کہاہے کہ چیف جسٹس کی استقامت سے سازشی عناصر میں کھلبلی مچ چکی ہے، فل کورٹ کا راگ صرف الیکشن سے بچنے کیلئے الاپا جا رہا ہے، عدالتوں سے مفرور نواز شریف کی جانب سے فل کورٹ کا مطالبہ مضحکہ خیز ہے، جھوٹ بول کر جیل سے فرار ہونے والا کس منہ سے عدلیہ کو بھاشن دے رہا ہے۔
چوہدری پرویز الہیٰ سے مختلف سیاسی رہنماؤں نے ملاقات کی جن میں سابق صوبائی وزرا میاں محمود الرشید، راجہ محمد بشارت اور سابق ایم پی اے عبداللہ یوسف شامل تھے۔
اس موقع پر گفتگو کرتے ہوئے پاکستان تحریک انصاف کے صدر نے کہا ہے کہ نواز شریف کے مطالبے سے بلی تھیلے سے باہر آ چکی ہے، ثابت ہو گیا کہ سپریم کورٹ کے خلاف سازش کی ڈوریاں لندن سے ہلائی جا رہی ہیں، سپریم کورٹ کا حکم ماننے سے انکار کیا گیا تو شہباز شریف توہین عدالت کے جرم میں نااہل ہوں گے اور جیل جائیں گے، سعودی عرب، متحدہ عرب امارات بھی آئی ایم ایف کو شہباز شریف اور اسحاق ڈار کی گارنٹی دینے کو تیار نہیں۔
چوہدری پرویز الہیٰ کہا ہے کہ آئی ایم ایف اور عالمی برادری جان چکے ہیں کہ شہباز شریف کی حکومت کمزور بیساکھیوں پر کھڑی ہے جس کا کوئی مستقبل نہیں، عالمی برادری تحریک انصاف کو چند ماہ بعد برسراقتدار آنے والی پارٹی کے طور پر دیکھ رہی ہے، امریکا میں بھی عمران خان کی غیر معمولی مقبولیت اور دوبارہ وزیراعظم بننے کی باتیں ہو رہی ہیں