کراچی میں سوا کروڑ کی چوری میں ملوث باپ،بیٹا،بہو گرفتار

کراچی (اسٹاف رپورٹر) پریڈی انویسٹی گیشن پولیس نے ڈیفنس میں سوا کروڑ کی چوری کی واردات میں ملوث باپ ، بیٹا اوربہو کو گرفتارکرکے طلائی زیورات برآمد کرلئے
9مارچ کو درخشاں کے علاقے ڈیفنس فیز 6میں بنگلے میں سوا کروڑ روپے مالیت کی چوری میں ملوث تین ملزمان کو گرفتار کرلیا گیا۔گرفتار ملزمان میں عطا اللہ اسکا بیٹا بچل اور اسکی بیوی نمرا زوجہ بچل شامل ہیں
اس حوالے سے پریڈی تھانہ شعبہ تفتیش کے انچارج نے بتایا کہ پولیس نے بنگلے میں کام کرنے والی ملازمہ نمرا کو تکنیکی بنیاد پر گرفتارکرکے تفتیش شروع کی تو معلوم ہوا کہ اس چوری میں اس کا شوہر بچل اور سسر عطااللہ بھی ملوث ہیں
گرفتار ملزمان سے چوری کئے جانے والے پچاس فیصد طلائی زیوارات ،نقدی اور قیمتی سامان برآمد کرلیا گیا جبکہ مزید سامان کی ریکوری کے لئے ملزما ن کی نشاندہی پر چھاپے مارے جارہے ہیں
پولیس کے مطابق جس بنگلے میں ملزمہ نمرا کام کرتی تھی اس کے مالکان بیرون ملک میں مقیم ہیں بنگلے میں ان کی بوڑھی ماں اور دیگر ملازم رہتے ہیں ، مقدمہ مدعی طفیل گھرکا ملازم ہے جس کی مدعیت میں درخشاں پولیس نے مقدمہ الزام نمبر127/23درج کیا تھا ۔ پولیس ملزمان سے مزید تفتیش کررہی ہے ۔