کراچی: عمارت میں آتشزدگی سے 1 شخص جاں بحق

کراچی (امت نیوز) کراچی نیوچالی کے قریب کثیر المنزلہ عمارت میں آگ لگ گئی، ایک شخص جاں بحق ہوگیا۔  فائر بریگیڈ حکام کے مطابق آگ عمارت کی دوسری، تیسری، دسویں اور گیارویں منزل پر لگی جو متعدد منزلوں تک پھیل گئی، آگ پر قابو پانے کے لیے آپریشن میں 10 فائر ٹینڈز، ایک اسنارکل اور ایک باؤزر نے حصہ لیا۔

حکام کے مطابق عمارت سے 3 زخمیوں کو نکال کر اسپتال منتقل کیا گیا جب کہ اطراف کی عمارتوں کو بھی خالی کرالیا گیا ہے۔ پولیس کے مطابق آتشزدگی کے نتیجے میں اب تک تین افراد جھلس کر زخمی اور ایک جاں بحق ہوچکا ہے۔

فائر حکام کا بتانا ہے کہ فائربریگیڈ کا عملہ شیشے توڑ کر عمارت میں داخل ہونے میں کامیاب ہوا اور آگ پر مکمل قابو پالیا گیا، اب عمارت میں کولنگ کا عمل جاری ہے۔