فلورملزنے کراچی میں آٹے کے بحران کا خدشہ ظاہر کردیا

کراچی(امت نیوز)پاکستان فلورملز ایسوسی ایشن نے کراچی میں آٹے کے بحران کا خدشہ ظاہر کردیا۔۔ ساتھ ہی  گندم کی ترسیل پرعائد پابندی ختم کرنے کے لیے حکومت سندھ کو 48 گھنٹے کا الٹی میٹم بھی دے دیا

ایسوسی ایشن کے مطابق پابندی ختم نہ ہونے کی صورت میں کراچی  میں  آٹے کے بحران کا خدشہ ہے۔

پاکستان فلور ملز ایسوسی ایشن سندھ ریجن کے چیئرمین چوہدری عامر کی صدارت میں ہونےو الے اجلاس میں  فیصلہ کیا گیا ہے کہ کراچی کی فلورملوں کے لیے اندرون سندھ سے گندم کی ترسیل پر پابندی ختم نہ کرنے کی صورت میں 48گھنٹے بعد سخت لائحہ عمل کا اعلان کیا جائے گا۔

چوہدری عامر نے کہا کہ کراچی میں گندم کی ترسیل بند ہونے سے 50فیصد سے زائد ملیں بند ہوگئی ہیں جبکہ آنے والے چند روز میں دیگر تمام  ملیں بند ہوجائیں گی۔

انہوں نے کہا کہ کراچی میں گندم کی پیداوار نہیں ہوتی ، کراچی کی فلورملیں اندرون سندھ سے ہی نجی گندم حاصل کرکے آٹا ودیگر مصنوعات تیار کرتی ہیں،لہذا حکومت اندرون سندھ سے گندم کی آزادانہ نقل وحمل کی فوری اجازت دے۔

انھوں نے بتایا کہ اندرون سندھ میں 100کلو گندم  کی قیمت 10400روپے ہے جبکہ کراچی میں وہی گندم 11800روپے  میں فروخت کی جارہی ہے۔

چوہدری عامر کا کہنا تھا کہ صوبے میں گندم کی قیمتوں میں یہ فرق بدعنوانی کا باعث بن گیا ہے۔ انہوں نے کہا کہ گندم کی ترسیل پر غیراعلانیہ پابندی سے کراچی میں آٹے کے بحران کا خدشہ پیدا ہوگیا ہے۔