الیکشن کمیشن کے اختیارات میں اضافےکیلئے10 رکنی کمیٹی قائم

اسلام آباد(امت نیوز)چیف الیکشن کمشنر کی درخواست پر الیکشن کمیشن کے اختیارات میں مزید اضافے کے لیے دس رکنی پارلیمانی کمیٹی قائم کردی گئی۔کمیٹی اپنی رپورٹ دس روز میں دونوں ایوانوں میں پیش کرے گی۔
نوٹیفکیشن کے مطابق سینیٹر علی ظفر،کامران مرتضیٰ،تاج حیدر اور سینیٹر دلاور خان،ڈاکٹر محمد افضل خان ڈھانڈلہ ،سید نوید قمر،محسن شاہنواز رانجھا ، انجینئر صابر حسین قائم خانی، وزیرقانون و انصاف اور وزیرپارلیمانی امور کمیٹی کا حصہ ہوں گے۔
پارلیمانی کمیٹی الیکشنز ایکٹ 2017 میں تجویز کردہ ترامیم کا جائزہ لے گی،کمیٹی 14 اپریل کو پہلے اجلاس میں اپنے ٹی او آرز طے کرے گی ، اور10 دن میںرپورٹ میں پیش کرے گی۔ انتظامی امور کے لیے خصوصی درجے کی حامل کمیٹی ارکان کے ٹی اے ڈی اے اور دیگر سہولیات کی فراہمی سے متعلق معاملات خود طے کرے گی۔
چیف الیکشن کمشنرسکندرسلطان راجہ کی جانب سے چیئرمین سینیٹ صادق سنجرانی اور اسپیکر قومی اسمبلی راجا پرویز اشرف کو لکھے گئےخط میں تجویز دی گئی ہےکہ الیکشن ایکٹ کےسیکشن 57 ون اور58میں ترامیم کی جائیں کہ عام انتخابات کی تاریخ کا اعلان الیکشن کمیشن کرے گا ۔
خط کے مطابق الیکشن کمیشن انتخابات کے نوٹیفیکیشن کے بعد الیکشن پروگرام میں تبدیلی کر سکے گا ، کمیشن نئی پولنگ تاریخ کے ساتھ نیا الیکشن پروگرام بھی جاری کر سکے گا۔