آزاد کشمیر قانون ساز اسمبلی، نئے قائد ایوان کا انتخاب نہ ہوسکا

مظفرآباد: آزاد جموں و کشمیر قانون ساز اسمبلی میں نئے قائد ایوان کا انتخاب نہ ہوسکا۔

آزاد جموں و کشمیر قانون ساز اسمبلی کا اجلاس ڈیڑھ گھنٹے کی تاخیر سے شروع ہوا۔اجلاس میں ارکان کی تعداد انتہائی کم تھی، کورم پورا کرنے کیلئے گھنٹیاں بجائی گئیں۔

اجلاس میں اپوزیشن کے 9 ارکان شریک ہوئے جبکہ کوئی حکومتی رکن شریک نہ ہوا۔ اپوزیشن کی جانب سےکورم پورا نہ ہونے کی نشاندہی کے بعد اجلاس کل دوپہر 2 بجے تک ملتوی کردیا گیا۔

آزادجموں کشمیرقانون ساز اسمبلی کے اجلاس میں نئے قائد ایوان کا انتخاب ہونا تھا تاہم اب ہفتے کو اجلاس میں نئے قائد ایوان کا انتخاب متوقع ہے۔

اسمبلی اجلاس سے کچھ دیر پہلے تک قائد ایوان کے انتخاب کیلئے انتخابی شیڈول بھی جاری نہ ہوسکا تھا، حکمراں جماعت کے 3 دھڑوں کی جانب سے 5 امیدوار میدان میں ہیں۔

تحریک انصاف نے چوہدری رشید کو وزارت عظمیٰ کا امیدوار کر دیا

ذرائع کے مطابق پاکستان تحریک انصاف نے چوہدری رشید کو وزارت عظمیٰ کا امیدوار نامزد کردیا ہے۔ اپوزیشن کی جانب سے پیپلزپارٹی کے چوہدری یاسین نامزد کیے گئےہیں۔