کرتب دکھانے والی چینی خاتون المناک حادثے کا شکار،ویڈیو وائرل

پیکنگ (نیٹ نیوز) چین میں شوہرکے ہمراہ خطرناک کرتب دکھا کر فن کا مظاہرہ کرنے والی خاتون المناک حادثے کا شکار ہوگئی۔

خاتون اسٹیج پرشوہر کے ہمراہ ڈانس شوکے دوران بلندی سے گر کرچل بسی، حاظرین کی جانب سے بنائی جانے والی گرنے کی ویڈیو سوشل میڈیا پروائرل ہے۔

میڈیا رپورٹس کے مطابق سن مومو نامی 37 سالہ چینی اداکارہ شوہرکے ہمراہ بلندی پر کرتب دکھا رہی تھی کہ اس دوران 30 فٹ سے زیادہ کی خوفناک اونچائی سے گر گئی۔ اس کا شوہر اسے ٹانگوں سے پکڑنے میں ناکام رہا تھا۔شدید زخمی ہونے والی سن مومو کو فوری طور پر اسپتال منتقل کیا گیاتاہم اس کی جان بچائی نہ جاسکی۔

اوگوار شوہر ژانگ مومو نے بتایا کہ دونوں ایک بیٹی اور ایک بیٹے کے ہمراہ خوشگوار زندگی بسرکررہے تھے ۔ چینی میڈیا کے مطابق دونوں میاں بیوی تجربہ کارپرفارمرز تھے اور گزشتہ کئی سال سے ایک ساتھ کام کررہے تھے، تاہم ایکروبیٹس کے دوران حفاظت کیلئے سیفٹی نیٹ نہیں لگائی تھی جس کے باعث خاتون جب توازن کھونے کے باعث گری تو اسے شدید چوٹیں آئیں۔

جس لمحے سن مومو گری ، ہال میں تماشائیوں کی چیخیں گونج اٹھیں جس کے بعد شو کو فوری طور پر منسوخ کر دیا گیا۔ المناک حادثے کا وائرل ویڈیو کلپ دیکھ کر صارفین ایسے شوز میں حفاظتی اقدامات یقینی بنانے کا مطالبہ کررہے ہیں ۔

دوسری جانب مقامی وزارت ثقافت اور سیاحت نے جوڑے کے پرفارمنس گروپ پر خطرناک ایڈونچر شوز کیلئے منظوری حاصل نہ کرنے کا الزام عائد کیا تھا۔