الوداع ماہ رمضان : ملک بھر میں جمعتہ الوداع ، سیکیورٹی سخت

کراچی(امت نیوز)  الوداع الوداع ماہ رمضان! کراچی سمیت ملک بھر میں عقیدت و احترام کے ساتھ جمعتہ الوداع منایا گیا۔

مساجدمیں نماز جمعہ کے اجتماعات کے موقع ملکی ترقی و خوشحالی , امن و استحکام کے لئے خصوصی دعائیں کی گئیں ۔ کراچی، لاہور اور اسلام آباد سمیت ملک کے مختلف شہروں میں جمعۃ الوداع کے موقع پر مساجد کے باہر سیکیورٹی کے سخت انتظامات کئے گئے ہیں، اسلام آباد کی شاہ فیصل مسجد کے باہر پولیس اور رینجرز کی بھاری نفری تعینات ہے جب کہ حساس قرار دی گئیں مساجد اور امام بارگاہوں کے باہراضافی نفری تعینات کی گئی ہے۔

جمعتہ الوداع کا دن اہل ایمان کو اس بات کی نوید سناتا ہے کہ رب تعالیٰ کا مہمان مہینہ رمضان المبارک اب رخصت ہونے کو ہے، علماء کرام رمضان المبارک کے آخری عشرے میں جمعتہ الوداع کی فضیلت پر روشنی ڈالیں گے، جمعۃ الوداع کے اجتماعات میں ملکی سلامتی و استحکام ، ترقی و خوشحالی ، دہشت گردی کے خاتمے اور امت مسلمہ کی سربلندی  کے لئے خصوصی دعائیں بھی مانگیں گے۔