معروف اسٹیج اداکارہ منزہ ملتانی حافظ آباد میں قتل

حافظ آباد (امت نیوز) معروف سٹیج اداکارہ منزہ ملتانی کو فائرنگ کرکے قتل کر دیا گیا۔ اسٹیج کی معروف اداکارہ منزہ ملتانی کی چند سال قبل حافظ آباد کے رہائشی زبیر بٹ نامی شخص سے شادی ہوئی جو زیادہ دیر قائم نہ رہ سکی اور زبیر بٹ نے منزہ کو طلاق دے دی۔

مقتولہ کی والدہ شاہدہ بی بی نے مقدمہ درج کرواتے ہوئے الزام عائد کیا کہ منزہ اپنی بیٹی ایمان فاطمہ سے عید ملنے سابق شوہر زبیر بٹ کے گھر آئی جہاں اسے اس کے سابق شوہر نے اپنے دیگر ساتھیوں سے مل کر فائرنگ کرکے قتل کردیا۔

سٹی پولیس حافظ آباد نے مقتولہ کی نعش پوسٹ مارٹم کیلئے ہسپتال منتقل کر دی جب کہ جائے وقوعہ سے شواہد بھی اکٹھے کیے گئے.

قتل کی واردات کے بعد ملزمان فرار ہو گئے جن کی گرفتاری کیلئے چھاپے مارے جا رہے ہیں۔ پولیس نے مقتولہ کے سابق شوہر سمیت دس افراد کے خلاف مقدمہ درج کر لیا۔