سلطان النیادی خلا میں چہل قدمی کرنے والے پہلے مسلمان خلا باز

کیلیفورنیا: متحدہ عرب امارات کے سُلطان النیادی خلا میں چہل قدمی کرنے والے پہلے مسلمان اور عرب خلاباز بن گئے۔ النیادی مشن مکمل کرکے انٹرنیشنل اسپیس سینٹر میں واپس آچکے ہیں

میڈیا رپورٹس کے مطابق 41 سالہ سُلطان النیادی امریکا سے خلامیں روانہ ہوئے تھے جنہیں وہاں چہل قدمی کے لیے 55 گھنٹے سے زائد ٹریننگ دی گئی تھی۔

امریکی خلائی ادارے ناسا کے مطابق سُلطان النیادی نے سات گھنٹے اور ایک منٹ پر محیط اسپیس واک کی ، اس سفرمیں ان کے ہمراہ ناسا کے اسٹیفن بوون تھے جن کی یہ آٹھویں اسپیس واک تھی۔

Watch live: Emirati Sultan al-Neyadi (@astro_alneyadi) onboard the #ISS becomes the first Arab astronaut to perform a #spacewalk.  https://t.co/H3pZNpjwlv

— Al Arabiya English (@AlArabiya_Eng) April 28, 2023

خلا میں رہتے ہوئے جب بھی کوئی خلاباز اپنی گاڑی سے باہر نکلتا ہے تو اسے ”اسپیس واک یا خلامیں چہل قدمی“ کہا جاتا ہے۔

اسپیس واک پر جانے والا پہلا شخص روسی خلاباز الیکسی لیونوف تھا۔ پہلی سپیس واک 18 مارچ 1965 کو کی گئی تھی اور یہ 10 منٹ طویل تھی۔

نیل آرمسٹرانگ پہلے خلاباز تھے جنہوں نے چاند پرچہل قدمی کی تھی۔ آرمسٹرانگ 20 جولائی 1969 کو 2 گھنٹے 31 منٹ تک چاند کی سطح پر اپنی چاند گاڑی اپالو 11 سے باہر رہے تھے۔

خلا میں سب سے زیادہ چہل قدمی کا عالمی ریکارڈ روسی خلاباز اناتولی سولوویف کے پاس ہے۔ انہوں نے 16 مرتبہ اسپیس واک پر گئے اور خلائی گاڑی سے باہر تقریبا 82 گھنٹے سے زیادہ خلا میں گزارے جو تقریباً ساڑھے 3 دن بنتے ہیں۔

واضح رہے کہ بین الاقوامی خلائی اسٹیشن پر1998 سے اب تک 260 بار خلا میں چہل قدمی کی جا چکی ہے۔