عوامی نیشنل پارٹی کے زیراہتمام آل پارٹیز کانفرنس آج ہوگی

پشاور(امت نیوز) عوامی نیشنل پارٹی کے زیراہتمام آل پارٹیز کانفرنس آج ہوگی ، اجلاس میں پی پی پی کا وفد سابق صدر آصف علی زرداری کی قیادت میں شریک ہو گا ۔

تفصیلات کے مطابق عوامی نیشنل پارٹی کی جانب سے بلائی گئی آل پارٹیز کانفرنس میں جے یو آئی کا وفد سربراہ مولانا فضل الرحمان کی قیادت میں شریک ہو گا، جبکہ ن لیگ کا وفد اسحاق ڈار کی قیادت میں شریک ہو گا، ایم کیو ایم وفد مقبول صدیقی کی قیادت میں وفد شریک ہو گا، قومی وطن پارٹی کا وفد آفتاب خان شیر پائو کی قیادت میں شریک ہو گا، بی این پی مینگل کا وفد اختر مینگل،باپ پارٹی کا وفد خالد مگسی کی قیادت میں شریک ہو گا، جماعت اسلامی کا وفد سراج الحق کی قیادت میں شریک ہو گا ۔

تحریک انصاف کا وفد اے این پی کی آل پارٹیز کانفرنس میں شریک نہیں ہو گا، آل پارٹیز کانفرنس میں موجودہ سلامتی ، امن و امان کا معاملہ زیر بحث آئے گا ، عدالتی ، اقتصادی، اور سیاسی صورتحال کے معاملہ پر متفقہ فیصلہ ہوگا ، اے این پی کی آل پارٹیز کانفرنس صبح 11 بجے شروع ہوگی ،آل پارٹیز کانفرنس کے اختتام پر شام سات بجے پریس کانفرنس ہو گی۔