کراچی: پولیس مقابلوں، کومبنگ آپریشن میں 5زخمیوں سمیت 38ملزم گرفتار

کراچی(اسٹاف رپورٹر)پولیس نے شہر کے مختلف علاقوں میں مبینہ مقابلے ،کارروائیوں اور کومبنگ آپریشن کے دوران 5 زخمی ملزمان،منشیات وگٹکا فروش عورت اورجواریوں سمیت دیگر جرائم میں ملوث 38ملزمان کو گرفتار کرکے قبضے سے اسلحہ،منشیات، گٹکا،موٹرسائیکلیں،موبائل فونز اور بھینسوں سے بھراٹرک برآمد کرنے کا دعویٰ کیا ۔تفصیلات کے مطابق سائٹ سپر ہائی وے صنعتی ایریاپولیس نے احسن آباداسکیم 33 نزدجامعہ الرشید کے قریب مبینہ پولیس مقابلے میں 2 ملزمان امجد ولد عمر جان اور عبدالحفیظ ولد غلام حیدر کو زخمی حالت میں گرفتارکرکے قبضے سے ایک پستول اور موٹر سائیکل برآمدکرلی۔

میمن گوٹھ پولیس نے کچا راستہ میمن گوٹھ نزدسوئی گیس لائن کے قریب مبینہ پولیس مقابلے میں دو ملزمان عابد حسین ولد آراز محمداور بلال ولد مٹھل کو زخمی حالت میں گرفتارکرلیا ،جبکہ ایک ساتھی موقع سے فرار ہوگیا، پولیس نے ملزمان کے قبضے سے 2 پستول ، چھینے گئے موبائل فونز، نقدی اور کار برآمد کر لی۔کورنگی صنعتی ایریا پولیس نے کورنگی مہران ٹاؤن سیکٹر H/6 میں ہائی ایکسٹینشن اسٹریٹ کے قریب مبینہ پولیس مقابلے میں ایک ملزم عبدالکریم عرف کاکا ولد محمد سردارکو زخمی حالت میں گرفتارکرلیا۔

عوامی کالونی پولیس منشیات فروش عورت زکیہ کلہوڑو اور زاہد سجرانی کو گرفتارکرکے آدھا کلو کے قریب آئس برآمد کرلی۔لانڈھی پولیس نے منشیات فروش شیر محمد عرف شیرو کو گرفتارکرکے آدھا کلو سے زائد چرس برآمد کرلی۔نبی بخش اور چاکیواڑہ پولیس نے کارروائیوں کے دوران 6 ملزمان ارسلان، کامران، نعیم احمد اعوان، عامر عرف بابا ودیال، سمیع اللہ اور فرحان علی کو گرفتارکرکے ایک پستول، 3 چوری شدہ موٹر سائیکلیں ،آدھا کلوسے زائد چرس اور گرام آئس برآمد کرلی گئی۔منگھوپیر اور اورنگی ٹاؤن پولیس نے4 ملزمان ساجد،جلیل، نصیر الدین اور شان محمدکو گرفتارکرلیا۔ الفلاح پولیس نے مطلوب و مفرور گٹکا ماوا فروش امتیاز فاروقی کو گرفتارکرکے گٹکا ماوابرآمد کرلیا۔

موچکو پولیس نے جوئے کے اڈے پر چھاپہ مار کر 14جواریوں کو گرفتارکرکے آلات قماربازی کا سامان اور داؤ پر لگی رقم برآمد کرلی۔علاوہ ازیں ایس ایس پی ملیر کے احکامات پر تھانہ بن قاسم ٹاؤن کی حدود میں کومبنگ آپریشن کیا گیا،جس میں پولیس افسران واہلکاروں نے حصہ لیا،آپریشن کے دوران چار ملزمان محمد اکرام، حاکم علی، نیاز احمد اور محمد یونس کو گرفتارکرکے ایک نائن ایم ایم پستول ، 5 کلو چھالیہ اور 2 کلو گٹکا ماوا برآمدکیا گیا۔ڈسٹرکٹ سینٹرل کے مختلف تھانہ جات کی حدود میں پولیس نے کومبنگ آپریشن کیا،آپریشن رشیدآباد، بھنگوریہ گوٹھ، الیاس گوٹھ اور پہاڑی کے علاقوں میں کیا گیا۔پولیس نے مطلوبہ ایریا کوگھیرے میں لے کر گھر گھر تلاشی لی اور مشتبہ افراد کو چیک کیا،اس دوران متعدد افراد کو حراست میں لے کر تھانہ منتقل کیا گی۔

آپریشن کے دوران منشیات و گٹکاماوا سمیت مسروقہ موٹر سائیکل برآمد کی گئی۔علاوہ ازیں شاہ لطیف ٹاؤن پولیس نے مویشیوں سے بھرا ٹرک برآمدکرکے ایک ملزم اعجازکو گرفتارکرکے ٹرک میں موجود سات بھینسیں برآمد کرلیں۔پولیس کا دعویٰ ہے کہ گرفتارملزم نے اپنے ساتھیوں کے ساتھ اسلحہ کے زور پر دھنی بخش پرتو گوٹھ شاہ لطیف میں ایک باڑے سے بھینسیں چھینی تھیں۔