راولپنڈی: شادی کی تقریب میں ہوائی فائرنگ پر33 افراد گرفتار

راولپنڈی( اسٹاف رپورٹر) ایس پی راول فیصل سلیم کو اندھی گولی لگنے کے معاملے کی تحقیقات کے دوران نیوٹاؤن پولیس نے ہولی فیملی کے گردونواح میں رات گئے گرینڈ آپریشن کیا اس دوران شادی کی تقریب میں ہوائی فائرنگ و آتش بازی کرنے والے 33 افراد کو گرفتارکرلیا۔

پولیس حکام کے مطابق ملزمان نے گرفتاری سے بچنےکے لئے مزاحمت اور پولیس پر فائرنگ بھی کی، ملزمان سے ایک کلاشنکوف، ایک 12 بور رائفل، 02 پسٹل اور گولیاں و کارتوس برآمد ہوئے، ملزمان سے آتش بازی کا سامان اور شراب کی بوتلیں بھی برآمد ہوئیں،

واقعہ کا مقدمہ دہشت گردی و پولیس مزاحمت سمیت دیگر دفعات کے تحت تھانہ نیوٹاؤن میں درج کرلیا گیا

پولیس کے مطابق گرفتار ملزمان سے تفتیش کرکے ساتھیوں کو بھی گرفتار کیا جائے گا، سی پی اوسید خالد محمود ہمدانی کا کہنا تھاکہ اپنی وقتی خوشی کے لئے شہریوں کی جانوں سے کھیلنے والے قانون کی گرفت سے نہیں بچ سکتے، ایس پی راول فیصل سلیم کی صحت اب بہتر ہے ان کا علاج معالجہ جاری ہے۔