آصف زرداری یاروں کےیار،نواز شریف اچھے کرکٹر,عمران خان نڈرہیں،جاویدشیخ

لاہور(امت نیوز)پاکستان فلم انڈسٹری کےمعروف اداکار اداکارجاوید شیخ کا کہناہے کہ ان کے سابق وزرائے اعظم عمران خان ، نواز شریف اور سابق صدر آصف زرداری سے قریبی تعلقات ہیں، وہ پرویز مشرف کے ساتھ 3 گھنٹے کی فلم بھی دیکھ چکے ہیں۔

نجی ٹی وی کے پروگرام میں اظہار خیال کرتے ہوئے جاوید شیخ نے کہا  کہ آصف زرداری دوستوں کے دوست ہیں۔

انہوں نے اسی حوالے سے بتایا کہ 1994 یا 1995 میں جب میں نے اپنی پہلی فلم ’مشکل‘ کی ہدایت کاری کی تو میں نے اس وقت کے وزیراعظم بے نظیر اور آصف زرداری کو بھی دعوت دی تھی۔

جب میں نے آصف زرداری سے درخواست کی تو وہ مجھے وزیراعظم ہاؤس لے گئے، اس دوران آصف زرداری نے خود گاڑی چلائی اور میں ساتھ بیٹھا تھا، تاہم بے نظیر کی حکومت ختم ہونے کی وجہ سے وہ فلم کی افتتاحی تقریب میں نہیں آسکے۔

جاوید شیخ نے نواز شریف کے حوالے سے بتایا کہ نواز شریف اچھے کرکٹر ہیں۔میں نے نواز شریف کے ساتھ کئی بار کرکٹ کھیلی ہے، وہ اچھے کرکٹر ہیں، انہیں کرکٹ کھیلنے کا بہت شوق تھا۔

جاوید شیخ نے پی ٹی آئی چیئرمین کے حوالے سے بات کرتے ہوئے کہا کہ عمران خان اصولوں پر چلنے والے آدمی ہیں۔میرے عمران خان کے ساتھ تعلقات 1995 سے ہیں، وہ نڈر اور اصولوں پر چلنے والے شخص ہیں، وہ کسی کو سفارش پر بھی نہیں رکھتے، مجھے ان کی یہی خوبی اچھی لگتی ہے

جاوید شیخ نے کہا کہ سابق صدر پرویز مشرف سے بھی ملنے کا موقع ملا۔2002 میں جب میری فلم ’یہ دل آپ کا ہوا‘ ریلیز ہوئی تو صدر کی جانب سے مجھے فون آیا، اور فلم کی پوری کاسٹ کو ایوان صدر آنے کی دعوت دی۔

جاوید شیخ نے کہا کہ جب ایوان صدر گئے تو وہاں صدر، ان کی بیگم اور والدہ سمیت تمام جنرلز اور ان کی بیگمات بھی موجود تھے، ان سب کے ساتھ ہم نے 3 گھنٹے 7 منٹ کی فلم دیکھی۔پرویز مشروف ہمارے ساتھ فلم دیکھنے کے لیے 4 گھنٹے بیٹھے رہے