بھارتی مسلم خاتون انتقال کے بعد بلدیاتی انتخاب جیت گئی

نئی دہلی(امت نیوز) بھارتی ریاست اترپردیش کے شہر بجنور کے باسیوں نے بلدیاتی امیدوار 30 سالہ آسیہ بی بی کو انتقال کر جانے کے باوجود ووٹ دے کر کامیابی سے ہمکنار کرادیا۔ ووٹرز نے ایسا ان سے کیا گیا وعدہ نبھانے اور انھیں خراج تحسین پیش کرنے کے لیے کیا۔بھارتی میڈیا کے مطابق اپنی نوعیت کے اس انوکھے واقعے میں مرحومہ آسیہ بی بی نے 44 فیصد ووٹ حاصل کر کے فتح حاصل کرلی۔ ان کا انتقال پولنگ کے دن سے 12 روز قبل پھیپھڑوں اور پیٹ کے انفیکشن کی وجہ سے ہوا تھا۔آسیہ بی بی اپنے حلقے میں کافی مقبول تھیں اور الیکشن والے دن ووٹرز نے احتراماً ان سے ایفائے عہد نبھانے کا عزم کرتے ہوئے کہا تھا کہ کم از کم آج کے الیکشن میں ہم آسیہ بی بی کے سوا کسی اور کو ووٹ نہیں دے سکتے۔الیکشن کمیشن کے عہدیداروں کا کہنا ہے کہ امیدوار آسیہ بی بی کے انتقال سے ان کے شوہر نے آگاہ کردیا تھا تاہم بیلٹ سے ان کا نام ہٹانے کا کوئی طریقہ کار موجود نہیں تھا۔ ایک بار انتخابی عمل شروع ہو جائے تو اسے روکا نہیں جا سکتا۔