جی 20 ممالک مقبوضہ کشمیر میں موٹ کا بائیکاٹ کریں، مشال ملک

اسلام آباد(اُمت نیوز)مشال حسین ملک نے G-20 ممالک پر زور دیا ہے کہ وہ بھارت کے غیر قانونی طور پر مقبوضہ جموں و کشمیر (IIOJK) میں فاشسٹ نریندر مودی حکومت کی جانب سے منعقد ہونے والے اپنے آئندہ پروگرام کا بائیکاٹ کریں اور مشورہ دیا کہ وہ دہائیوں سے جاری تنازع کو حل کرنے کے لیے اپنی طاقت اور اثر و رسوخ کا استعمال کریں۔
نظر بند سینئر حریت رہنما یاسین ملک کی اہلیہ مشال حسین ملک نے کہا کہ کشمیریوں نے بھارت کے اس طرح کے ڈراموں کو مسترد اور بائیکاٹ کیا ہے اس لیے G-20 ممالک کو بھی مودی کو واضح پیغام دینے کے لیے آئندہ کانفرنس کا بائیکاٹ کرنا چاہیے کہ وہ برداشت نہیں کر سکتے۔
انہوں نے کہا کہ مودی کی مسلم کشی پالیسیوں کی وجہ سے مقبوضہ کشمیر مسلمانوں کے قبرستان میں تبدیل ہو چکا ہے۔
مشال ملک نے یہ بھی کہا کہ بھارتی وزیراعظم نریندر مودی کی خونریزی سب کے سامنے آ گئی ہے، مقبوضہ کشمیر میں اجتماعی قبروں کی شناخت بھارتی تاریخ دان انگانا چٹرجی نے 2012 میں کی تھی، انہوں نے مزید کہا کہ انگانا چٹرجی نے مقبوضہ کشمیر کے بانڈی پورہ، بارہمولہ اور کوٹورا اضلاع میں 2700 اجتماعی قبروں کی نشاندہی کی۔
اس حوالے سے کشمیر ہیومن رائٹس واچ کی رپورٹ کے مطابق مقبوضہ کشمیر کے 55 دیہات میں اجتماعی قبروں سے 2943 لاشیں برآمد ہوئی ہیں۔ انہوں نے مزید کہا کہ مقبوضہ کشمیر میں ان اجتماعی قبروں میں سے 80 فیصد قبروں کی شناخت نہیں ہو سکی ہے۔
مشال ملک نے یہ بھی کہا کہ کشمیر ہیومن رائٹس واچ نے بھی 4 اضلاع میں اجتماعی قبروں میں 2,730 لاشوں کا سراغ لگایا ہے۔ جس کے بعد 2011 میں بین الاقوامی تنظیم ہیومن رائٹس واچ نے بھارتی حکومت سے انکوائری کمیشن بنانے کا مطالبہ کیا۔
ہیومن رائٹس واچ کے مطابق بھارتی حکومت جواب دینے کے بجائے الزامات کی تحقیقات سے بھاگ رہی ہے۔
اس سلسلے میں جولائی 2008 میں یورپی پارلیمنٹ نے کشمیر میں اجتماعی قبروں کے حوالے سے ایک قرارداد بھی منظور کی تھی، قرارداد میں بھارت سے اجتماعی قبروں کی تحقیقات اور غیر جانبدارانہ تحقیقات کا مطالبہ کیا گیا۔
واضح رہے کہ لاپتہ افراد کے والدین کی تنظیم کی جانب سے جاری کردہ رپورٹ کے مطابق 800 کشمیری اب بھی لاپتہ ہیں۔