جی ایچ کیو پر دھاوا: پی ٹی آئی خواتین کی آڈیو لیک ہوگئی

اسلام آباد (امت نیوز) جی ایچ کیو پر دھاوا بولنے سے متعلق پی ٹی آئی کی سابق ایم پی اے خواتین کی مبینہ آڈیو لیک ہوگئی۔ جی ایچ کیو پر دھاوا بولنے کے حوالے سے پی ٹی آئی کی رکن قومی اسمبلی کنول شوذب کا کردار بھی سامنے آگیا۔

مبینہ آڈیو میں جی ایچ کیو پر دھا وا بولنے سے متعلق پی ٹی آئی رہنما کنول شوزب کا مبینہ  کردار نظر آرہا ہے جس میں  سابق رکن پنجاب اسمبلی فرح آغا کنول شوزب کا پیغام آگے پارٹی کی ویمن ونگ کی دیگر خواتین کو پہنچا رہی ہیں  ۔

مبینہ آڈیو میں سابق ایم پی اے فرح آغا پی ٹی آئی کی کارکن سبرینہ سےکہہ رہی ہیں کہ  اب جی ایچ کیو پہنچنا ہے، میں نکل آئی ہوں کیونکہ میم کنول ( سابق ایم این اے کنول شوذب) نکلی ہوئی ہیں، میم کنول نے کہا ہے کہ جی ایچ کیو کی طرف آنا ہے، جی ایچ کیو جانے کے لیے میم کنول نےکہا ہے، ہم نے جی ایچ کیو جانا ہے فیض آباد آدمی جا رہے ہیں ۔

ویمن ونگ کی اس شرمناک حرکت9مئیGHQپلان کی پُرزورمزمت کرتی ہوں اوراُمیدکرتی ہوں کےخان صاحب اس سارےواقع کانوٹس خود لیں کہ کیسے چیزیں exploite کی گئیں۔
قانون کابھرپورساتھ دونگی اوراپنی لیگل ٹیم سےڈسکشن کےبعدچنددن میں تمام ثبوتوں کےساتھ پریس کانفرنس میں باقی انکشافات کرونگی! pic.twitter.com/1RhqotVJU2

— Palwasha Abbasi (@PalwashaAbbasi0) May 20, 2023

فرح آغا نے مزید کہا کہ انٹرنیٹ نہیں چل رہا ساری سروسز بند ہیں ، فرح آغا پی ٹی آئی ویمن ونگ کی ڈپٹی جنرل سیکرٹری فرخندہ سے بھی بات کر رہی ہیں، جس میں ان کا کہنا تھا کہ لیاقت باغ والی جگہ پر اتنی بری شیلنگ ہو رہی ہے، پولیس اور لڑکوں کی لڑائی ہو رہی ہے، صدر جانے کے سارے راستے بند ہیں، ، فیض آباد میں راشد حفیظ، شفیق اور سماویہ ہے، سماویہ ہیروئن بنی آگے آگے جا رہی ہے۔

علاوہ ازیں پاکستان تحریک انصاف ویمن ونگ کی ڈپٹی جنرل سیکرٹری پلوشہ عباسی کا بھی بیان سامنے آچکا ہے جس میں انہوں نے 9 مئی واقعات کی مذمت کرتے ہوئے کہا تھا کہ جی ایچ کیو پر حملے میں کنول شوذب کی سربراہی میں ویمن ونگ ملوث ہے۔

واضح رہے کہ پاکستان تحریک انصاف کے چیئرمین عمران خان کی گرفتاری کے بعد ملک بھر میں کارکنوں کی جانب سے  پرتشدد احتجاج کیا گیا ۔