افغانستان میں بارودی سرنگ دھماکا، بچہ جاں بحق، 3 زخمی

کابل (نیٹ نیوز) افغانستان کے جنوبی صوبے زابل میں ماضی کی جنگوں سے بچ جانے والی ایک بارودی سرنگ پھٹنے سے ایک بچہ جاں بحق اور تین زخمی ہو گئے۔ہفتہ کو افغان صوبائی پولیس کے دفتر کے ایک بیان میں کہا گیا ہے کہ ایک بارودی سرنگ جو ماضی کی جنگوں سے بچ گئی تھی، جمعہ کو شاہ جوئے ضلع کے سرخوگان علاقے میں پھٹ گئی جس میں ایک بچہ جاں بحق اور تین دیگر زخمی  ہوئے۔

خانہ بدوش خاندانوں کے بچوں کا ایک گروپ ایک کھیت میں ٹریکٹر کے ساتھ کھیل رہا تھا جب انہیں ایک کھلونا نما آلہ ملا جس سے وہ کھیلنے لگے اور وہ اچانک پھٹ گیا جس سے ایک بچہ جاں بحق اور تین زخمی ہو گئے۔

اسی طرح کے ایک دھماکے میں منگل کے روز شمالی صوبہ جوزجان میں دو بچے جاں بحق اور چار زخمی ہوئے تھے۔