کیچ، سیکیورٹی فورسز پوسٹ پر حملہ،2 سپاہی شہید

کوئٹہ: بلوچستان کے ضلع کیچ میں سیکیورٹی فورسز کی پوسٹ پر حملہ ہوا ہے، جس کے نتیجے میں 2 سپاہی شہید ہوگئے ۔

پاک فوج کے شعبہ تعلقات عامہ (آئی ایس پی آر) کے مطابق حملہ پاک ایران بارڈر پر سنگوان کے علاقے میں کیا گیا۔

سیکیورٹی فورسز نے بھرپور جوابی کارروائی کی اور فائرنگ کے تبادلہ میں دو سپاہی ڈیرہ غازی خان کے رہائشی 34 سالہ حسنین اور جھل مگسی کے رہائشی 27 سالہ سپاہی عنایت اللہ شہادت کے مرتبے پر فائز ہوئے۔

آئی ایس پی آر کا کہنا ہے کہ سیکیورٹی فورسز نے فوری طور پر ایرانی حکام سے رابطہ کیا ہے تاکہ دہشت گردوں کے فرار کے راستے مسدود کیے جاسکیں۔

آئی ایس پی آر کے مطابق حملے کے بعد علاقے میں فوری طور پر آپریشن شروع کردیا گیا۔