وزیر اعظم نے بلوچستان عوامی پارٹی کے تحفظات دور کردیے

اسلام آباد: وزیراعظم شہباز شریف نے بجٹ پر بلوچستان عوامی پارٹی کے تحفظات دور کردیے جس کے بعد بی اے پی نے بجٹ اجلاس میں شرکت کا فیصلہ کرلیا۔

وزیراعظم سے بلوچستان عوامی پارٹی کے وفد نے ملاقات کی اور انھیں یقین دلایا کہ ان کی جماعت حکومت کی بھرپور حمایت جاری رکھے گی۔ شہباز شریف نے اس موقع پر کہا کہ بلوچستان عوامی پارٹی حکومت کی ایک اہم اتحادی جماعت ہے اور حکومت کے ہر فیصلے میں اہم کردار ادا کیا، پاکستان کی ترقی بلوچستان کی ترقی سے مشروط ہے۔

بلوچستان عوامی پارٹی کے تحفظات دور کرنے کیلیے کمیٹی بھی قائم کردی گئی ہے۔ چیئرمین سینیٹ صادق سنجرانی، خالد مگسی، غفور حیدری اور آغا حسن بلوچ کمیٹی میں شامل ہیں۔ اس کے علاوہ وفاقی وزیر خزانہ اسحاق ڈار، احسن اقبال، مصدق ملک، اعظم نذیر تارڑ اور منظور کاکڑ بھی کمیٹی کے رکن ہیں۔ کمیٹی آئندہ ہفتے اپنی سفارشات پیش کرے گی۔