ڈالرکی ذخیرہ اندوزی روکنے کیلیے اہم قوانین متعارف کرانے کا فیصلہ

اسلام آباد: حکومت کی جانب سے آئندہ مالی سال کے بجٹ میں فنانس بل کے ذریعے اہم قوانین بھی متعارف کرانے کا فیصلہ کیا گیا ہے۔

ذرائع کے مطابق ڈالر اور دیگر کرنسی کی ذخیرہ اندوزی پر سزا دینے کیلیے قانون سازی کا فیصلہ کیا گیا ہے جس کے تحت غیر ملکی کرنسی کی ذخیرہ اندوزی پر قید اور جرمانے کی سزا کیلیے قانون سازی ہوگی۔

نئے قانون کا اطلاق غیر ملکی کرنسی کی ذخیرہ اندوزی کرنے والے اداروں اور افراد پر ہوگا۔

ذرائع کا کہنا ہے کہ ملک میں غیر ملکی کرنسی لانے کی حد بڑھانے کیلیے بھی قوانین متعارف کرائے جا رہے ہیں جس کے تحت بیرون ملک سے آنے والے ایک سال کے دوران ایک لاکھ ڈالر تک ساتھ لا سکیں گے، ملک میں ایک لاکھ ڈالر تک لانے والوں سے آمدن کا ذریعہ نہیں پوچھا جائے گا۔

ذرائع کے مطابق اس وقت ذریعہ آمدن ظاہر کیے بغیر 50 لاکھ روپے مالیت کی کرنسی پاکستان لانے کی اجازت ہے۔