دبئی پاکستان کی سیاست کا گڑھ بن گیا

دبئی (امت نیوز) سابق وزیراعظم نوازشریف اور وزیرخارجہ بلاول بھٹو زرداری ان دنوں دبئی میں ہی موجود ہیں،سابق صدر آصف زرداری بھی کراچی سے دبئی پہنچ گئے ، جہاں وہ اہم ملاقاتیں کریں گے۔

نواز شریف دبئی میں اپنے داماد اور وفاقی وزیر خزانہ سینیٹر اسحاق ڈار کے صاحبزادے علی ڈار کی رہائش گاہ ایمریٹس ہلز میں قیام پذیر ہیں۔ انہیں متحدہ عرب امارات پہنچنے کے بعد سے دبئی حکومت خصوصی پروٹوکول فراہم کررہی ہے۔ نواز شریف آج شاہی خاندان اور بزنس کمیونٹی کے ممتاز افراد سے اہم ملاقاتیں کریں گے، جس میں مریم نواز بھی موجود ہوں گی۔

ذرائع کے مطابق سابق وزیراعظم دبئی میں قیام کے بعد ابوظبی اور سعودی عرب جائیں گے جس کے بعد دوبارہ دبئی واپس آجائیں گے۔ وہ اپنے خاندان کے دیگر افراد کے ہمراہ عید الاضحیٰ دبئی میں منائیں گے۔

پاکستان میں نواز شریف کی واپسی کے حوالے سے تمام قانونی پہلوؤں اور درپیش مسائل کا جائزہ لیا جا رہا ہے، آئینی و قانونی ماہرین سے صلاح و مشورہ جاری ہے اوراس حوالے سے روڈ میپ بھی طے کیا جا رہا ہے، اہم سیاسی شخصیات کی ملاقاتیں بھی متوقع ہیں جو چند دنوں میں دبئی پہنچیں گی۔

وزیرخارجہ بلاول بھٹو زرداری بھی متحدہ عرب امارات، جاپان اور امریکا کا دورہ کریں گے، تاہم وہ عیدالاضحیٰ متحدہ عرب امارات میں اپنی بہن بختاور بھٹو زرداری کے گھر پر منائیں گے۔

وزیرخارجہ متحدہ عرب امارات سے سرکاری دورے پر جاپان جائیں گے، جاپان کا 2 روزہ دورہ جاپانی وزیرخارجہ کی دعوت پر ہوگا، جہاں سے وہ امریکا جائیں گے اور امریکا میں تھنک ٹینکس سے بھی بات چیت ہوگی۔