2 کروڑ روپے تاوان کے بعد کاروباری شخصیت بلال حشمت بازیاب

لاہور انویسٹی گیشن پولیس نے کارروائی کرتے ہوئے تاوان کے لیے اغوا ہونے والے کاروباری شخصیت بلال حشمت کو بازیاب کروالیا۔

پولیس کے مطابق بلال حشمت اور ان کے ڈرائیور کو چند روز پہلے لاہور ڈیوس روڈ سے نامعلوم افراد نے اغوا کرلیا تھا اور انہیں اپنے ساتھ پشاور لے گئے تھے۔

ملزمان نے بلال حشمت کے اہل خانہ سے 2 کروڑ روپے تاوان مانگا اور اہل خانہ نے ملزمان کو 2 کروڑ تاوان بھی دے دیا۔

پولیس نے کارروائی کرتے ہوئے رنگ روڈ کے قریب سے 4 ملزمان کو گرفتار کرلیا اور مغویوں کو بازیاب کراکے تاوان کی رقم بھی برآمد کرلی۔

پولیس کا کہنا ہے کہ ملزمان کے خلاف مقدمہ درج کر کے تفتیش شروع کر دی گئی ہے۔ ملزمان کا تعلق اوکاڑہ سے ہے۔