راولپنڈی،نجی پلازہ میں آتشزدگی،25 دکانیں جل کر خاکستر،ایک شخص جاں بحق

راولپنڈی (اُمت نیوز)راولپنڈی میں واقع نجی پلازہ میں لگنے والی آگ 3 پلازوں تک پھیل گئی، خوفناک آتشزدگی کے باعث 25 دکانیں جل کر خاکستر ہوگئیں جبکہ آگ میں جھلسنے سے ایک شخص جاں بحق ہوگیا۔
ریسکیو ذرائع کے مطابق مری روڈ راولپنڈی پرواقع نجی شاپنگ مال میں آگ بھڑک اٹھی، دیکھتے ہی دیکھتے آگ 3 پلازوں تک پھیل گئی۔
ایک پلازے کی دوسری اور تیسری منزل پر 25 دکانیں جل کر خاکستر ہوگئیں جبکہ آگ کے باعث ایک شخص جھلس کر جاں بحق ہوگیا۔
ریسکیو ٹیمیں اور فائربرگیڈ عملے نے مسلسل 3 گھنٹے کی کوششوں کے بعد آگ پر قابو پایا ہے۔
ریسکیو اہلکار کے مطابق آگ لگنے کی وجہ تاحال معلوم نہ ہوسکی۔