باجوڑ میں جے یو آئی کے کنونشن میں دھماکا، امریکا کا اظہار افسوس

واشنگٹن : امریکا نے خیبرپختونخوا کے ضلع باجوڑ میں جمعیت علمائے اسلام (ف) کے کنونشن میں ہونے بم دھماکے کے بعد متعدد افراد کے جاں بحق ہونے پرافسوس کا اظہار کیا ہے۔

خیال رہے کہ خیبرپختونخوا کے ضلع باجوڑ کے صدر مقام خار میں ہونے والے بم دھماکے کے دوران چالیس سے زائد افراد جاں بحق اور سینکڑوں افراد زخمی ہو چکے ہیں۔

اس دھماکے پر رد عمل دیتے ہوئے اسلام آباد میں امریکی سفارتخانے نے سماجی رابطے کی ویب سائٹ ٹویٹر پر لکھا کہ اسلام آباد میں امریکی سفارتخانہ شمال ضلع باجوڑ میں ہونے والے المناک دھماکے میں جانوں سے ہاتھ دھونے والے متاثرین کے خاندانوں اور پیاروں کے ساتھ تعزیت کا اظہار کرتا ہے۔

The United States Embassy in Islamabad extends its deepest condolences to the families and loved ones of the victims who lost their lives in the tragic blast in Bajaur district, northwestern Pakistan. 1/3

— U.S. Embassy Islamabad (@usembislamabad) July 30, 2023

انہوں نے مزید لکھا کہ ہم تشدد کے اس گھناؤنے فعل کی پرزور مذمت کرتے ہیں، جس کے نتیجے میں بے گناہ جانیں ضائع ہوئیں اور بہت سے لوگوں کو نقصان پہنچا۔ پرامن اور جمہوری معاشرے میں ایسی دہشت گردی کی کوئی جگہ نہیں ہے۔ ہم اس مشکل وقت میں پاکستانی عوام کے ساتھ یکجہتی کے ساتھ کھڑے ہیں۔

امریکی سفارتخانے نے لکھا کہ ہم دہشت گردی سے نمٹنے اور اس کے شہریوں کے تحفظ کو یقینی بنانے میں پاکستان کی کوششوں کی حمایت کرنے کے اپنے عزم کا اعادہ کرتے ہیں۔