دنیا کے معمر ترین شخص کا 127 سال کی عمر میں انتقال

برازیلیا: دنیا کے معمر ترین شخص جوز پالینو گومز اپنی 128 ویں سالگرہ سے صرف چند روز قبل برازیل میں اپنے گھر میں مختصرعلالت کے بعد جہان فانی سے کوچ کرگئے۔

عالمی خبر رساں ادارے کے مطابق جوز پاؤلینو گومز کو دنیا کا معمر ترین آدمی سمجھا جاتا تھا۔ وہ ایک ماہ سے علیل تھے اور بستر پر تھے۔ سوگواران میں سات بچے، 25 پوتے، 42 پڑپوتے،11 پڑپوتیاں ہیں۔

ان کی شادی 1917 میں ہوئی تھی جس میں ان کی تاریخ پیدائش 4 اگست 1895 درج ہے۔ انہی کے محلے میں ایک 98 سالہ خاتون نے اپنے بچپن کو یاد کرتے ہوئے بتایا کہ وہ جوز پاؤلینو گومز کو اس وقت سے جانتی ہیں جب وہ نوجوان تھے۔

جوز پاؤلینو گومز نے ایک بھرپور اور سادہ زندگی گزاری۔ وہ صنعتی اور کیمیکل زدہ اشیا کے بجائے خود اُگائی ہوئی سبزیوں کو کھانا پسند کرتے تھے۔ وہ اپنی موت سے 4 ماہ قبل تک گھڑ سواری کرتے رہے ہیں۔