پی آئی اے کا حج آپریشن گزشتہ شب مکمل ہو گیا

کراچی: پی آئی اے کا 21 مئی کو شروع ہونا والا حج آپریشن 2 اگست کی شب مکمل ہوگیا۔ پی آئی اے کا قبل از حج آپریشن 21 مئی سے شروع ہوا اور 22جون تک جاری رہا ۔

بعد از حج آپریشن 2جولائی سے شروع ہوا اور 2 اگست کو اختتام پذیر ہوا۔بعد از حج آپریشن میں کل 258 پروازیں آپریٹ کی گئیں جس میں جدّہ کے لیے 136 اور مدینہ کے لیے 122 پروازیں آپریٹ ہوئیں ۔

ترجمان کے مطابق حج آپریشن میں پی آئی اے کے شیڈول کی باقاعدگی شاندار رہی ،96فیصد پروازیں وقت پر یا وقت سے تھوڑا قبل روانہ ہوئیں جو حج آپریشن میں شامل تمام ائیرلائنز سے بہتر تھیں،پی آئی اے کی حج پروازوں سے کل 61,461 حجا ج کرام مقدس فریضے کی ادائیگی کے بعد وطن واپس پہنچے ۔

حجاج کرام کیلیے سٹی چیک ان کا بندوبست بھی کیا گیا تھا جس سے ان کو کئی گھنٹے قبل ائیرپورٹ پہنچنے کی زحمت نہیں ہوئی ،سی ای او پی ائی اے نے حج آپریشن میں شامل ٹیموں کی کارکردگی کو سراہا ۔

سی ای او پی آئی اے کا کہنا تھا کہ مشکل حالات کے باوجود حج آپریشن اعلی طریقے سے منظم کیا گیا جس کے لئے پاکستان اور سعودیہ عرب میں موجود ٹیمیں قابل ستائش ہیں۔