ترک صدر کی آواز کی نقل کر کے فراڈ کرنے والا شہری گرفتار

انقرہ: ترک صدر رجب طیب اردگان کی آواز کی نقل کر کے کاروباری افراد سے فراڈ کرنے والے شہری کو گرفتار کر لیا گیا۔ ترک میڈیا کے مطابق ترک نیشنل انٹیلی جنس آرگنائزیشن ( ایم آئی ٹی ) نے ایک ایسے شخص کو گرفتار کیا ہے جس نے آرٹیفیشل انٹیلی جنس کا استعمال کرتے ہوئے صدر رجب طیب اردگان کی آواز کی نقل کی اور منتخب کمپنیوں اور اعلیٰ سطح کے سرکاری افسران کے ساتھ فراڈ کیا۔

ایم آئی ٹی کے مطابق دھوکہ باز شخص نے صدر اردگان کی آواز کی نقل کرنے کے لیے مصنوعی ذہانت کے سافٹ ویئر کا استعمال کیا اور 10 سے زیادہ مختلف غیر ملکی شہریوں کے موبائل فونز سے کاروباری افراد کو دھوکہ دیا۔

سیکورٹی ذرائع نے بتایا کہ مجرم کو فوری طور پر گرفتار کر کے قانون نافذ کرنے والے اداروں کے حوالے کر دیا گیا ہے۔

عہدیداروں نے ایسے کیسز کے پیش نظر شہریوں کو محتاط رہنے کی ضرورت پر زور دیا اور کہا کہ نام، آواز اور شناخت سے متعلق فراڈ کے خلاف اقدامات میں مسلسل بہتری لائی جائے گی۔