دوسرا ون ڈے، پاکستان کی افغانستان کو 1 وکٹ سے شکست

ہمبنٹوٹا: پاکستان کرکٹ ٹیم نے دوسرے ایک روزہ بین الااقومی میچ میں افغانستان کو سنسنی خیز مقابلے کے بعد ایک وکٹ سے شکست دے دی، نسیم شاہ نے آخری اوور کی پانچویں گیند پر چوکا لگا کر ٹیم کو کامیابی سے ہمکنار کرایا۔

ہمبنٹوٹا میں کھیلے جانے والے دوسرے ون ڈے انٹرنیشنل میں افغان ٹیم نے پاکستان کو جیت کے لئے 301 رنز کا ہدف دیا تھا جسے قومی ٹیم نے آخری اوور میں 9 وکٹوں کے نقصان پر حاصل کیا۔ افغانستان نے ٹاس جیت کر پہلے بیٹنگ کا فیصلہ کیا جو درست ثابت ہوا اور افغان اوپنرز نے پاکستانی باؤلرز کا جم کر مقابلہ کیا۔

افغان ٹیم کی جانب سے اوپنر رحمان اللہ گرباز نے 151 گیندوں پر 151 رنز بنا کر ٹیم کو بڑا سکور میں مدد فراہم کی ، ان کی اننگ میں 14 چوکے اور 3 چھکے شامل تھے۔

دیگر افغان بیٹرز میں ابراہیم زردان نے 80، محمد نبی نے 29 اور حشمت اللہ شاہدی نے 15 رنز کی اننگ کھیلی جبکہ میزبان ٹیم کی جانب سے مقررہ 50 اوورز میں 5 وکٹوں کے نقصان پر 300 رنز بنائے گئے۔

پاکستان کی جانب سے شاہین شاہ آفریدی نے 2، نسیم شاہ اور اسامہ میر نے ایک، ایک کھلاڑی کو آؤٹ کیا۔

جواب میں پاکستانی ٹیم نے 301 رنز کا ہدف آخری اوورر کی پانچویں گیند پر 9 وکٹوں کے نقصان پر مکمل کر کے افغان ٹیم کو سنسنی خیز مقابلے کے بعد شکست دی۔