پاکستان بار کونسل کا 9ستمبر کو ملک گیر ہڑتال کا اعلان

اسلام آباد: پاکستان بار کونسل نے 9 ستمبر کو ملک گیر ہڑتال کا اعلان کرتے ہوئے صدر مملکت ڈاکٹر عارف علوی سے مطالبہ کیا ہے کہ وہ اپنی آئینی ذمہ داری پوری کرتے ہوئے آئین کے مطابق 90 روز کے اندر انتخابات کا اعلان کریں۔پاکستان بار کونسل کے زیر انتظام کانفرنس کے بعد چیئرمین ایگزیکٹو کمیٹی حسن رضا پاشا نے بار کونسل کے دیگر عہدیداروں کے ہمراہ پریس کانفرنس کرتے ہوئے کہا کہ پاکستان بار کونسل کی کال پر ملک بھر سے وکلا نمائندگان نے آج کے اجلاس میں شرکت کی۔انہوں نے کہا کہ اجلاس میں یہ قرار داد منظور کی گئی کہ 90دن میں عام انتخابات آئینی تقاضہ ہے اورصدر پاکستان اپنی آئینی ذمہ داری پوری کرتے ہوئے آئین کے مطابق 90 روز کے اندر انتخابات کا اعلان کریں۔

انہوں نے کہا کہ دوسری قرارداد میں مطالبہ کیا گیا کہ ججز، جنرل، بیوروکریسی کو ملنے والی سہولیات فوری ختم کی جائیں اور موجودہ حکومت ایک ہفتے میں مفت بجلی، گیس اور ٹیلی فون بل ختم کرنے کا اعلان کرے۔ان کا کہنا تھا کہ لاپتہ افراد کو عدالتوں میں پیش کیا جائے اور لائیرز پروٹیکشن ایکٹ پر عملدرآمد ہونا چاہیے، پارلیمان کے منظور کردہ ایکٹ پر آخر عملدرآمد کیوں نہیں کیا جا رہا، وکلا کے گھروں پر چھاپوں اور انہیں ہراساں کرنے پر تشویش ہے کیونکہ وکلا آئین و قانون کے مطابق اپنے فرائض سر انجام دے رہے ہیں۔چیئرمین ایگزیکٹو کمیٹی نے کہا کہ ججز کے خلاف ریفرنس پر فوری سماعت ہونی چاہیے اور ہم نامزد چیف جسٹس سے ججز کے خلاف ریفرنس پر کارروائی کا مطالبہ کرتے ہیں۔انہوں نے کہا کہ 9 ستمبر 2023 کو ملک گیر ہڑتال ہو گی اور کل ہی مراعات یافتہ طبقے سے مراعات واپس لی جائیں، 9 ستمبر کو وکلا پر امن ریلیاں نکالیں گے اور پنجاب بار کونسل لاہور میں کنونشن کا انعقاد کریں گے۔

حسن رضا پاشا نے کہا آئین کے آرٹیکل 48 کے تحت یہ صدر مملکت کا اختیار ہے کہ انتخابات کی تاریخ دیں، انتخابات ہر صورت 90 روز کے اندر ہونے چاہئیں، آئین پاکستان پر تمام وکلاء تنظیمیں متحد ہیں۔پاکستان بار کونسل کے وائس چیئرمین ہارون الرشید نے کہا کہ پاکستان میں آئینی بحران ہے، اسمبلیاں تحلیل ہونے کے باوجود 90 روز میں الیکشن کا انعقاد نظر نہیں آرہا لہذا صدر پاکستان اپنا آئینی کردار ادا کریں اور انتخابات کی تاریخ دیں۔انہوں نے کہا کہ ہمارا دوسرا ایجنڈا مہنگائی ہے، مہنگائی سے عام عوام کا جینا دوبھر ہے۔ہارون الرشید نے ججز، جرنیلوں اور حکومتی عہدیداروں کی مراعات ختم کرنے کا مطالبہ کرتے ہوئے کہا کہ بجلی، پیٹرول اور گیس کے بل قومی خزانے سے نہ دیئے جائیں۔انہوں نے کہا کہ بلوچستان کے ساتھ ساتھ باقی ملک میں مسنگ پرسن کا معاملہ بڑھتا جارہا ہے۔ اس لیے ہمارا مطالبہ ہے کہ وکلا پروٹیکشن بل پر فل فور عمل کیا جائے اور وکلا کے گھروں پر غیرقانونی چھاپے مارنا بند کیے جائیں، نامزد چیف جسٹس پاکستان قاضی فائز عیسیٰ سے مطالبہ ہے کہ ججز کیخلا ف ریفرنسز پر کارروائی کریں۔