بھارتی اوپنر گوتم گمبھیر کو شاہد آفریدی نے آڑے ہاتھوں لے لیا

اسلام آباد(اُمت نیوز)قومی کرکٹ ٹیم کے سابق چیف سلیکٹر اور کپتان شاہد آفریدی نے پاک بھارت کرکٹرز کی دوستی پر ردعمل دیتے ہوئے بھارتی اوپنر گوتم گمبھیر کو آڑے ہاتھوں لے لیا۔
شاہد آفریدی نے سابق بھارتی کرکٹر کے بیان پر سخت ردعمل دیتے ہوئے کہا کہ ’’ میدان سے باہر بھی کرکٹرز کی زندگی ہوتی ہے لیکن وہ ساتھ ساتھ قوم کے سفیر بھی ہوتے ہیں، اس لیے انہیں دیگر ٹیموں کے کھلاڑیوں احترام دینے کا طریقہ سیکھنا چاہیے‘‘۔
انہوں نے کہا کہ ’’ میں گوتم سے مختلف سوچتا ہوں، ہم کرکٹرز ہیں اور دنیا بھر میں ہمارے مداح ہیں، اس لیے اپنی دوستی سے مثبت پیغام پہنچانے کی ضرورت ہے، ہاں میدان پر جارحیت ہے لیکن میدان سے باہر بھی زندگی ہے‘‘۔
قبل ازیں ایشیاکپ کے دوران پاکستان اور بھارتی کرکٹرز کے درمیان دوستی دیکھ کر سابق اوپنر گوتم گمبھیر آگ بگولہ ہوگئے تھے، انہوں نے میچ کے دوران بارش کے وقت اسٹار اسپورٹس پر گفتگو کرتے ہوئے کہا کہ ہندوستانی ٹیم اسٹیڈیم میں 140 کروڑ لوگوں کی نمائندگی کر رہی ہے، اُسے میچ کے دوران پاکستانی کھلاڑیوں سے دوستی نہیں نبھانی چاہیے۔
گوتم گمبھیر نے کہا کہ جب آپ اپنی قومی ٹیم کے لیے میدان میں کھیلتے ہیں، تو آپ کو دوستی کو باؤنڈری سے باہر چھوڑنا چاہیے، دونوں ٹیموں کے پلئیرز کو جیت کیلئے ایک دوسرے سے لڑنا چاہیے۔
اسی طرح بھارت اور نیپال کے درمیان میچ کے دوران گوتم گمبھیر کی تماشائیوں کو نازیبا اشارہ کرنے کی ویڈیو سوشل میڈیا پر وائرل ہوگئی تھی، جس کا ملبہ بھی سابق کرکٹر نے پاکستان پر گرایا تھا۔
واضح رہے کہ ایشیاکپ میں پاک بھارت ٹیمیں 10 سمتبر کو ایک مرتبہ پھر سپر فور مرحلے میں ایک دوسرے کے مدمقابل آئیں گی۔