صدر کے عہدے کی میعاد 9 ستمبر کو ختم ہوچکی، عطا اللہ تارڑ

اسلام آباد: پاکستان مسلم لیگ (ن) کے رہنما عطا اللہ تارڑ کا کہنا ہے کہ صدرِ مملکت کے عہدے کی میعاد 9 ستمبر کو ختم ہوچکی ہے، صدرِ مملکت کو اختیار کس نے دیا کہ الیکشن کی تاریخ دیں۔

لیگی رہنما عطا تارڑ نے لاہور میں پریس کانفرنس کرتے ہوئے کہا کہ عارف علوی اس وقت عبوری صدر ہیں، لیکن ان کےعبوری صدر ہونے کا نوٹیفکیشن جاری نہیں ہوا۔

عطا تارڑ نے کہا کہ الیکشن کی تاریخ پر صدر مملکت نے وزارت قانون سے رائے مانگی ہے، الیکشن کی تاریخ دینے کا اختیار الیکشن کمیشن کے پاس ہے۔ان کا کہنا تھا کہ 9 ستمبر کے بعد آرٹیکل 58 غیر فعال ہوچکا ہے۔

لیگی رہنما نے مزید کہا کہ پی ٹی آئی معیشت کو غیرمستحکم کرنے کی کوشش کرتی ہے، یہ بے یقینی کی فضا اپنے بیانیے کیلیے پیدا کرتے ہیں، یہ سب کچھ اٹک میں بیٹھے شخص کی وجہ سے ہورہا ہے۔

ان کا کہنا تھا کہ عبوری صدر باز رہیں، انتخابات کا اعلان الیکشن کمیشن نے کرنا ہے۔ الیکشن کمیشن اور حکومت صدرکے احکامات ماننے کے پابند نہیں ۔

واضع رہے صدر مملکت ڈاکٹر عارف علوی کی نگراں وزیر قانون سے الیکشن کی تاریخ دینے کے حوالے سے مشاورت کے بعد قیاس آرائیاں شروع ہوگئیں کہ صدر جلد انتخابات کی تاریخ کا اعلان کرنے والے ہیں۔