پرویز الٰہی کیخلاف جنگلات اراضی کیس کی فائل دوبارہ کھل گئی

اسلام آباد(اُمت نیوز)پرویز الٰہی کیخلاف جنگلات اراضی کیس کی فائل دوبارہ کھل گئی سابق وزیر اعلیٰ چودھری پرویز الہٰی کیخلاف جنگلات اراضی کیس کی تحقیقات دوبارہ شروع کر دی گئی۔تفصیلات کے مطابق نیب نے اسلام آباد سمیت 15اضلاع کے ڈپٹی کمشنرز سے 25 ستمبر تک پرویز الٰہی سمیت 14 افراد کی منقولہ اور غیر منقولہ جائیدادوں کی خرید وفروخت کی تفصیلات طلب کی ہیں،نیب کال اپ نوٹس کے مطابق محکمہ جنگلات کی اراضی ایک نجی ٹاؤن کومنتقل کرنے کے کیس میں پرویز الٰہی پھر شکنجے میں آگئے ہیں۔
راولپنڈی کے نجی ٹاؤن مالکان اور لینڈ ريونیو افسران سمیت 14افراد کے خلاف تحقیقات شروع کردی گئی ہیں، نیب کے مطابق پرویز الٰہی پر راولپنڈی کے قریب تخت پری جنگل کی اراضی غیر قانونی طور نجی ٹاؤن کو منتقل کرنے کا الزام ہے، نیب نے ان افسروں کے اثاثہ جات کی تفصیلات ڈپٹی کمشنرز اسلام آباد، لاہور، کراچی، گوادر، ملتان، راولپنڈی، کوئٹہ اور پشاور سے طلب کی ہیں ۔ اس کے علاوہ اٹک، شیخوپورہ، جہلم، میانوالی، پاکپتن، فیصل آباد اور ڈی سی گوجرانوالہ سے بھی تفصیلات طلب کی گئی ہیں۔