سندھ میں سابق وزرا سے سیکیورٹی و مراعات واپس لینے کا حکم

اسلام آباد: الیکشن کمیشن نے سندھ میں سابق وزرا سے سیکیورٹی اور مراعات واپس لینے کاحکم دیا ہے۔

چیف سیکریٹری اور آئی جی سندھ کو الیکشن کمیشن کی جانب سے لکھے گئے مراسلے میں کہا گیا ہے کہ سابق وفاقی و صوبائی وزرا سے سیکیورٹی اور مراعات واپس لی جائیں۔ الیکشن کمیشن نے چیف سیکریٹری و آئی جی سندھ سے 3 روز میں اس حوالے سے رپورٹ طلب کرلی ۔

الیکشن کمیشن نے سندھ کابینہ کے سابق ارکان کی جانب سے تاحال پروٹوکول لینے  کے معاملے پر نوٹس لے لیا۔ اس سلسلے میں سیکریٹری الیکشن کمیشن نے مراسلے میں مزید لکھا کہ سابق وزرا اور سیاسی بنیادوں پر تعینات کی گئی شخصیات سے سیکیورٹی پروٹوکول واپس لیا جائے۔ سندھ کابینہ کے سابق ارکان تاحال سیکیورٹی اور دیگر مراعات کا استعمال کر رہے ہیں۔

الیکشن کمیشن کے مطابق کابینہ کے سابق ارکان کا مراعات لینا الیکشن کمیشن کی گائیڈ لائنز کی خلاف ورزی ہے۔سندھ کابینہ کے سابق ارکان سے سرکاری رہائش گاہیں اور مراعات فوری واپس لی جائیں۔ سابق وزیر اعلیٰ، سابق صوبائی وزرا اور دیگر کابینہ ارکان سے مراعات واپس لی جائیں اور الیکشن کمیشن کو 3 روز میں آگاہ کیا جائے۔