امریکا میں پارٹی کے دوران فائرنگ،3افراد ہلاک،3زخمی

ڈینور: امریکی ریاست کولوراڈو کے شہر ڈینور میں ایک پارٹی کے دوران فائرنگ سے 3 افرادہلاک اور 3 زخمی ہو گئے۔غیرملکی خبررساں ادارے کے مطابق پولیس حکّام نے بتایاکہ ابتدائی طور پر پارٹی کے دوران فائرنگ ہونے پر ایک شخص کی ہلاکت کی اطلاع ملی تھی۔ پولیس حکّام نے بتایا کہ فائرنگ سے متاثرہ افراد کو مقامی ہسپتالوں میں لے جایا گیا تو ان میں سے 2 افراد کو مردہ قرار دے دیا گیا۔

پولیس حکّام کے مطابق پارٹی کے دوران فائرنگ کی وجہ ابھی غیر واضح ہے، ابتدائی معلومات میں یہ بات سامنے آئی ہے کہ فائرنگ میں 2 ہتھیار استعمال کیے گئے۔پولیس حکام نے بتایا کہ فی الحال متاثرین کے نام اور عمریں سامنے نہیں آئی ہیں اور ہم ابھی ان کی میڈیکل رپورٹ کا انتظار کر رہے ہیں لیکن بظاہر یہی لگتا ہے کہ ہلاک ہونے والے تینوں مرد ہیں جبکہ زخمیوں میں 2 خواتین اور 1 مرد شامل ہے۔