بھارت میں بابر اعظم کی سالگرہ کا جشن، ویڈیو وائرل

بنگلور: ورلڈ کپ میچز کیلئے بھارت میں موجود پاکستان کرکٹ ٹیم کے کپتان بابراعظم کی سالگرہ شاندار طریقے سےمنائی گئی۔ پاکستان کرکٹ بورڈ (پی سی بی) کی جانب سے بھارتی شہر بنگلورو میں منائی گئی بابراعظم کی سالگرہ اور کیک کاٹنے کی ویڈیو شیئر کی گئی ہے۔

اس موقع پر قومی ٹیم کے تمام کھلاڑیوں، کوچنگ اسٹاف اور مینجمنٹ نے خصوصی شرکت کی۔ویڈیو میں دیکھا جاسکتا ہے کہ بابر اعظم کے آتے ہی دیگر تمام کھلاڑیوں نے تالیاں بجا کر ان کا استقبال کیا، پھر بابر نے کیک کاٹا اور وہاں موجود تمام لوگوں کو اپنے ہاتھ سے کیک کھلایا۔

خوشی کے اس موقعے پر بابر اعظم نے نوجوان کھلاڑی محمد حارث کے ساتھ مذاق بھی کیا اور انہیں کیک کھلانے کی بجائے ساتھ کھڑے کوچ کو کیک کھلا دیا، جس پر محمد حارث کا منہ کھلا کا کھلا رہ گیا۔