میئر کراچی کے کاغذات نامزدگی مسترد کرنے کی درخواست پر فیصلہ محفوظ

کراچی: عدالت نے میئر کراچی مرتضیٰ وہاب کے کیماڑی سے کاغذات نامزدگی منظور کرنے کے خلاف درخواست پر فیصلہ محفوظ کرلیا۔ الیکشن ٹریبونل 18 اکتوبر کو فیصلہ سنائے گا۔

کراچی سٹی کورٹ میں میئر کراچی مرتضیٰ وہاب کے کیماڑی سے کاغذات منظوری کے خلاف درخواست کی سماعت ہوئی۔

ریٹرننگ افسر، میئر کراچی مرتضی وہاب کے وکیل و دیگر عدالت میں پیش ہوئے۔ جب کہ ریٹرننگ افسر نےعدالت میں تحریری بیان جمع کروا دیا۔

وکیل درخواست گزار عثمان فاروق ایڈووکیٹ نے عدالت کے سامنے مؤقف پیش کیا کہ کسی بھی معاملےپرقانون سے ہٹ کر کچھ نہیں ہوسکتا، مرتضی وہاب ضلع کیماڑی سے تعلق نہیں رکھتے،ان کے کاغذات نامزدگی یہاں سے ہی منظور ہوئے۔

وکیل عثمان فاروق ایڈووکیٹ نے استدعا کیا کہ مئیر کراچی کے کیماڑی سے کاغذات نامزدگی مسترد کیے جائیں۔

عدالت نے فریقین کے دلائل مکمل ہونے پر فیصلہ محفوظ کرلیا۔ الیکشن ٹریبونل 18 اکتوبر کو فیصلہ سنائے گا۔