فلسطینیوں سے قومی کرکٹرز کا انوکھے انداز میں یکجہتی کا اظہار

لاہور (اُمت نیوز) غزہ میں ہسپتال پر اسرائیل کے فضائی حملے کیخلاف آواز اٹھانے میں مہذب دنیا کی طرح پاکستانی کرکٹرز بھی پیچھے نہ رہے۔
منگل کی شام کو اسرائیلی فوج نے غزہ میں ہسپتال پر بمباری کر کے علاج کیلئے موجود 500 سے زائد فلسطینیوں کو شہید کر دیا تھا، شہید ہونے والوں میں مریض، ڈاکٹرز اور نرسنگ سٹاف شامل ہیں، اسرائیل کے وحشیانہ عمل کیخلاف دنیا بھر میں شدید غم و غصہ پایا جا رہا ہے۔
غزہ پر تاریخ کے سب سے تباہ کن اور انسانیت سوز حملے نے دنیا بھر میں موجود ہر درد مند دل کو دہلا کر رکھ دیا ہے، مہذب دنیا کے تمام شعبہ زندگی سے تعلق رکھنے والے افراد اسرائیلی فوج کی بدترین دہشت گردی اور بھیانک جنگی جرم کی شدید مذمت کر رہے ہیں۔
کھیلوں اور شوبز سے وابستہ نمایاں شخصیات کی جانب سے بھی اسرائیلی مظالم بند کرنے اور فلسطینیوں کا اجتماعی قتل عام روکنے کا مطالبہ کیا جا رہا ہے، بھارت میں موجود پاکستانی کرکٹ ٹیم کے کھلاڑیوں نے بھی قدم بڑھاتے ہوئے مظلوم فلسطینیوں کے ساتھ یکجہتی کا اظہار کیا ہے۔
قومی ٹیم کے نائب کپتان شاداب خان، محمد نواز، اسامہ میر، افتخار احمد، حارث رؤف اور سابق کرکٹر اظہر علی نے سماجی رابطے کی ویب سائٹ ایکس پر فلسطین کے قومی پرچم کی تصاویر پوسٹ کر کے مظلوم فلسطینی عوام کیلئے اپنی بھرپور حمایت کا اظہار کیا ہے۔
زمبابوے کے کرکٹر سکندر رضا نے بھی فلسطینیوں کی حمایت میں سوشل میڈیا پر پوسٹ شیئر کی۔
یاد رہے کہ گزشتہ ہفتے محمد رضوان نے سری لنکا کیخلاف ورلڈ کپ کے میچ میں ٹیم کی جیت کے بعد ایکس پوسٹ میں اپنے مین آف دی میچ ایوارڈ کو “غزہ کے بہن بھائیوں” کے نام کیا تھا جس پر بھارت میں ان کے خلاف شدید ردعمل دیکھنے میں آیا تھا۔
محمد رضوان کو بھارتی شائقین کے ناروا سلوک کا سامنا کرنا پڑا تھا جبکہ آئی سی سی میں بھی شکایت کی گئی تھی جس پر انٹرنیشنل کرکٹ کونسل نے رضوان کے ٹویٹ کو انکا انفرادی معاملہ قرار دیا تھا۔