جامعہ کراچی کی طالبات کے مبینہ اغواء کے معاملے کا ڈراپ سین

کراچی (اُمت نیوز)جامعہ کراچی کی طالبات کے مبینہ اغواء کی کوشش کا واقعہ اسٹریٹ کرائم کا نکلا۔ پولیس نے متاثرہ طالبہ کا بیان ریکارڈ کرلیا ہے۔

متاثرہ طالبہ نے اپنے بیان میں بتایا کہ چھ سے زائد لڑکیاں اسٹاپ پر موجود تھیں ،اس دوران دو موٹرسائیکل سواروں نے آکر واردت کی کوشش کی۔ دونوں ملزمان کی عمریں 18 سے 20 سال کے درمیان تھیں۔

طالبہ کے مطابق ملزمان نے آ کر وہاں کھڑی طالبات سے لیپ ٹاپ اور موبائل فونزچھیننے کی کوشش کی، طالبات بڑی مشکل سے وہاں سے بھاگ کرقریبی شادی ہال میں جا کرچھپ گئیں۔

متاثرہ طالبہ نے بتایا کہ ہمارے شور مچانے پر وہ بھاگ گئے ،انہوں نے ہمیں اغواء کرنے کی کوشش نہیں کی۔

واقعے کی اطلاع 15 پردینے کے بعد پولیس موقع پرپہنچی۔

طالبات کی جانب سے پولیس کو دی گئی درخواست میں کہا گیا ہے کہ قانونی کارروائی نہیں چاہتے لیکن طلبہ کو سیکیورٹی فراہم کی جائے۔

مذکورہ طالبات جامعہ کراچی کے ایوننگ پروگرام میں زیر تعلیم ہیں۔

واضح رہے کہ جامعہ کراچی کے باہر اسٹریٹ لائٹس نہ ہونے اور ترقیاتی کام کے باعث وارداتوں میں اضافہ ہورہا ہے۔

ایس ایس پی ایسٹ عرفان بہادر نے اس حوالے سے نمائندہ آج نیوز کو بتایا کہ جائے وقوعہ پر پہنچ کر انتظامیہ سے بھی ملاقات کی ہے،اطراف کی سی سی ٹی وی فوٹیج حاصل کرکے ملزمان کی تلاش کی جارہی ہے۔