عمران خان کے وفادار الیکشن میں حصہ لیں گے، نگراں وزیر اعظم

لاہور: نگراں وزیراعظم انوارالحق کاکڑ نے کہا ہے کہ عمران خان کے وفادار امیدوارالیکشن میں حصہ لیں گے۔

انوارالحق کاکڑ نے میو اسپتال لاہور کے دورے کے موقع پر میڈیا سے گفتگو کرتے ہوئے کہا کہ ووٹ ڈالنے کیلیے جتنے آپ بے چین ہیں اتنا ہی میں بھی بےچین ہوں ، انتخابات کی تاریخ الیکشن کمیشن دے گا، ہم بھی چاہتے ہیں ملک میں ایک مستقل حکومت آئے۔

انہوں نے کہا کہ دنیا کا کوئی بھی ملک بغیر دستاویز کسی کو رہنے کی اجازت نہیں دیتا، کسی بھی دوسرے ملک کا شہری ویزہ حاصل کر کے پاکستان آسکتا ہے، کسی کی املاک پر قبضہ کرنا یا ہتھیانہ ہمارا مقصد نہیں۔

نگران وزیراعظم انوارالحق کاکڑ کا کہنا تھا کہ الیکشن کمیشن نے پی ٹی آئی پر کوئی پابندی نہیں لگائی، تو نگراں حکومت اس پر پابندی لگانے کا کیسے غیرقانونی و غیر آئینی اقدام کرسکتی ہے، نہ یہ ہمارا اختیار ہے نہ قانون اس کی اجازت دیتا ہے، ان کے خلاف کارروائی کا تاحال کوئی معاملہ نہیں، ان کے امیدوار الیکشن مہم میں حصہ لیں گے، عمران خان کے وفادار اس الیکشن میں حصہ لیں گے۔