الیکشن کمیشن نے انتخابات کیلیے 11 فروری کی تاریخ دیدی

اسلام آباد: الیکشن کمیشن نے سپریم کورٹ کو آگاہ کیا ہے کہ ملک میں انتخابات 11 فروری  کو کروائے جائیں گے۔

الیکشن کمیشن کے وکیل نے سپریم کورٹ میں بیان دیا کہ  انتخابات 11 فروری کو کروائے جائیں گے، سجیل سواتی نے مزید کہا کہ 30 نومبر تک حلقہ بندیاں مکمل ہو جائیں گی، عوام کی آسانی کیلیے اتوار کا دن معین کرنے کی کوشش میں تھے، ماہ فروری میں پہلا اتوار 4 تاریخ کو تھا تاہم دوسرا اتوار 11 فروری کو بنتا ہے لہٰذا فیصلہ کیا کہ 11 فروری کو الیکشن منعقد کروائے جائیں۔

جسٹس اطہر من اللہ نے ریمارکس دیئے کہ آئین کے تحت انتخابات کی تاریخ کا تعین صدر مملکت کرتے ہیں۔چیف جسٹس پاکستان نے الیکشن کمیشن کے وکیل  کو ہدایت کی  کہ صدر مملکت سے اس معاملے پر مشاورت کی جائے۔

واضح رہے کہ سپریم کورٹ میں  90روز میں عام انتخابات کے انعقاد سے متعلق کیس کی سماعت ہوئی،چیف جسٹس پاکستان جسٹس قاضی فائز عیسیٰ کی سربراہی میں 3رکنی بنچ نے سماعت کی جس میں جسٹس امین الدین خان اور جسٹس اطہر من اللہ شامل ہیں۔ دوران سماعت الیکشن کمیشن حکام، اٹارنی جنرل اور پی ٹی آئی وکیل علی ظفر عدالت میں پیش ہوئے۔