کراچی میں 2 ،لاہور میں 3 نوجوانوں نے خود کشی کرلی

کراچی،لاہور: کراچی میں 2 ،لاہور میں 3 نوجوانوں نے خود کشی کرلی،کراچی ملیر میمن گوٹھ میں نوجوان نے پانی کے ٹینک میں چھلانگ لگاکر اور اسٹیل ٹاؤن میں نوجوان نے اپنے پستول سے خود کو گولی مارکرخود کشی کرلی ہے۔ملیر میمن گوٹھ میں درسانو چھنو میں واقع پانی کے ٹینک سے ایک نوجوان کی ڈوبی ہوئی لاش ملی۔ اطلاع ملنے پر پولیس اور ریسکیو ادارے موقع پر پہنچے اور نوجوان کی لاش ٹینک سے نکال کر اسپتال منتقل کی متوفی نوجوان کی شناخت 22 سالہ ذیشان ولد شاہد کے نام سے ہوئی، نوجوان کھوکھراپار کا رہائشی تھا جس کا دماغی توازن درست نہیں تھا وہ پہلے بھی خودکشی کی کوشش کرچکا ہے۔

نیشنل ہائی وے گھگھر پھاٹک ایم ڈی اے فلیٹ کے قریب صابو گوٹھ میں گھر میں فائرنگ سے ایک نوجوان جاں بحق ہوگیا نوجوان کی شناخت 25 سالہ طارق چانڈیو ولد محمد نواز کے نام سے ہوئی۔پولیس کے مطابق متوفی نوجوان اسٹیٹ ایجنسی پر کام کرتا تھا اور نشے کا عادی تھا،شہر لاہور میں مختلف مقامات پر 3 افراد نے خودکشی کرلی ۔

بتایاگیاہے کہ لیاقت آباد کے علاقہ میں 2 نوجوانوں عمران اور رضوان نے نامعلوم وجوہات پر زہریلی اشیا کھا کر جبکہ نواب ٹاؤن کے علاقے کھمبا گاوں کے رہائشی 20 سالہ نوجوان عمیر بشیر نے گھریلو جھگڑے پر گلے میں پھندا ڈال کر پنکھے سے لٹک کر خودکشی کر لی واقعہ کی اطلاع پر متعلقہ تھانوں کی پولیس نے لاشیں مردہ خانے منتقل کر کے قانونی کارروائی کا آغاز کردیا۔