اسرائیلی درندگی جاری، غزہ میں مزید 350 فلسطینی شہید

اسرائیلی فوج نےغزہ میں ٹینکوں اور بکتر بند گاڑیوں کو دوبارہ تعینات کرنے کے ساتھ مزید فضائی حملے شروع کردیے۔

ابتدائی اطلاعات کے مطابق غزہ شہر کے مشرقی اور جنوبی اطراف بھی شدید فضائی حملوں کی زد میں ہیں۔

گزشتہ 24 گھنٹوں کے دوران گھروں پر فضائی حملوں میں 350 فلسطینی شہید ہوگئے۔ اسرائیلی فوج نے ایک بیان میں کہا کہ غزہ کی پٹی میں 450 اہداف کو نشانہ بنایا ہے۔

رات کی تاریکی اور صبح کے وقت غزہ پٹی میں زیادہ سے زیادہ رہائشی مکانات کو نشانہ بنایا گیا، جس کے نیتجے میں اسکول، اسپتال، کلینک، دکانیں اور بازار مکمل طور پر تباہ ہوگئے۔

فلسطینی وزارت صحت کا کہنا ہے کہ مقبوضہ مغربی کنارے میں رات اور آج صبح اسرائیلی حملوں میں چھ فلسطینی شہید اور متعدد زخمی ہوئے، شدید بمباری سے صحت کی سہولیات تباہ ہو رہی ہیں۔