عمران خان کی دو نئے بینک اکاؤنٹ کھلوانے کی اجازت مل گئی

راولپنڈی: آفیشل سیکرٹ ایکٹ کی خصوصی عدالت نے بانی چیئرمین پی ٹی آئی عمران خان کی دو نئے بینک اکاؤنٹ کھلوانے کے لیے بائیو میٹرک کروانے کی درخواست منظور کرلی ۔

عدالت نے سپرٹینڈنٹ اڈیالہ جیل کو ہدایت کی کہ جیل مینوئل کے تحت بینک عملے کو بانی پی ٹی آئی سے ملنے کی اجازت دی جائے۔

عدالتی حکم کے بعد نجی بینک کا عملہ بانی چیئرمین عمران خان کی بائیو میٹرک تصدیق کے لیے اڈیالہ جیل پہنچا۔ عملہ ضروری کارروائی مکمل کرنے کے بعد واپس روانہ ہوگیا۔

آفیشل سیکرٹ ایکٹ کی خصوصی عدالت کے جج ابولحسنات ذوالقرنین نے بانی پی ٹی آئی عمران خان کے بینک اکاؤنٹ کے حوالے سے درخواست پر سماعت کی۔

بانی پی ٹی آئی کے وکیل خالدیوسف نے موقف اپنایا کہ اسلام آباد کے نجی بینک میں اکاؤنٹ غیرفعال ہوچکا ہے ۔ بانی چیئرمین پی ٹی آئی دو نئے بینک اکاؤنٹ بھی کھلوانا چاہتےہیں نئے بینک اکاؤنٹس لاہور، میانوالی سے الیکشن لڑنے کے اخراجات کے لیے استعمال ہوں گے، غیرفعال اکاؤنٹ اور دو نئے اکاؤنٹس کھلوانے کے لیے بائیؤ میٹرک درکار ہے.

وکیل خالدیوسف نے استدعا کی کہ بینک اکاؤنٹ عملے کو بانی چیئرمین پی ٹی آئی عمران خان سے جیل میں بائیو میٹرک سامان سمیت ملنے کی اجازت دی جائے، عدالت نے بانی چیئرمین پی ٹی آئی کی بینک اکاؤنٹ سے متعلق درخواست منظور کرلی۔

عدالت نے بانی پی ٹی آئی سے بینک عملے کی ملاقات سے متعلق اڈیالہ جیل سپرنٹینڈنٹ کو ہدایات جاری کرتے ہوئے کہا کہ جیل مینوئل کے تحت بینک عملے کو بانی پی ٹی آئی سے ملنے کی اجازت دی جائے۔