آئی ٹی کا شعبہ ملکی معیشت میں کلیدی کردار ادا کر سکتا ہے، وزیراعظم

اسلام آباد : نگران وزیراعظم انوار الحق کاکڑ نے کہا ہے آئی ٹی کا شعبہ ملکی معیشت میں کلیدی کردار ادا کر سکتا ہے، حکومت آئی ٹی کے شعبے میں بیرونی سرمایہ کاری کیلئے اقدامات اٹھا رہی ہے اور اس ضمن میں مثبت پیشرفت ہوئی ہے۔ ان خیالات کااظہار انہوں نے اپنی زیر صدارت سپیشل ٹیکنالوجی زونز اتھارٹی کے بورڈ آف گورنرز کے پانچویں اجلاس سے خطاب کرتے ہوئے کیا۔

وزیر اعظم آفس کے میڈیا ونگ سے جاری بیان کے مطابق وزیراعظم نے اجلاس سے خطاب کرتے ہوئے کہا پاکستان میں انفارمیشن ٹیکنالوجی کے شعبے میں ترقی کی بےحد استعداد موجود ہے ۔ وزیراعظم نے ہدایت کی کہ پاکستان میں آئی ٹی کی ترقی اور ترویج کیلئے دنیا بھر سے آئی ٹی ماہرین کو راغب کرنے کیلئے ضروری پالیسیاں بنائی جائیں۔ اجلاس نے سپیشل ٹیکنالوجی زونز اتھارٹی کے بورڈ آف گورنرز کے چوتھے اجلاس کے فیصلوں کی توثیق کی جبکہ سپیشل ٹیکنالوجی زونز اتھارٹی کے بورڈ آف گورنرز کی بجٹ اور فنانس ، آڈٹ اور ٹیکنیکل کمیٹیوں کی تشکیلِ نو کی منظوری بھی دی گئی۔

اجلاس نے اتھارٹی کی لائسنسنگ فریم ورک ، اتھارٹی پروسیجرز اور فیس ریگولیشنز کے مسودات کو ٹیکنیکل کمیٹی کے سامنے پیش کرنے کی منظوری بھی دی۔ اجلاس میں سپیشل ٹیکنالوجی زونز اتھارٹی کےحوالےسے مختلف امور زیر بحث آئے ۔