مریدکے: ٹائر پھٹنے کی وجہ سے کیری ڈبے کو حادثہ، 7 افراد شدید زخمی

مریدکے(اُمت نیوز) مریدکے میں ٹائر پھٹنے کی وجہ سے کیری ڈبہ سڑک کے ڈیوائڈر سے ٹکرا گیا جس کی وجہ سے 7 افراد شدید زخمی ہو گئے۔

ٹریفک کا افسوسناک حادثہ مریدکے کے علاقے نارووال روڈ پر پیش آیا جہاں بدقسمت خاندان کیری ڈبہ پر سوار ہو کر گھر واپس جا رہا تھا کہ راستے میں ٹائر پھٹ گیا، حادثے کے نتیجے میں 7 افراد شدید زخمی ہو گئے، زخمیوں میں خاتون اور بچی بھی شامل ہیں۔

حادثے کی اطلاع ملنے کے بعد ریسکیو ٹیم موقع پر پہنچ گئی اور زخمی ہونے والوں کو ٹی ایچ کیو ہسپتال منتقل کر دیا جہاں انہیں طبی امداد دی جا رہی ہے، زخمیوں میں سے 3 افراد کی حالت تشویشناک بتائی جاتی ہے جنہیں لاہور منتقل کر دیا گیا۔